ក្រុមហ៊ុន Google បានប្រកាសជាផ្លូវការថា អ្នកប្រើប្រាស់នឹងអាចលុប ឬបិទសញ្ញាសម្គាល់ (Visible Watermark) ដែលមើលឃើញនៅលើរូបភាព វីដេអូ និងបទចម្រៀង ដែលបង្កើតឡើងដោយបច្ចេកវិទ្យា AI របស់ខ្លួនបាន។ លោក Josh Woodward អនុប្រធានផ្នែក Gemini របស់ Google បានឱ្យដឹងថា មុខងារនេះនឹងដាក់ឱ្យប្រើប្រាស់នៅលើម៉ូឌែល AI សំខាន់ៗដូចជា Nano Banana, Omni និង Lyria ដោយអ្នកប្រើប្រាស់អាចចូលទៅកំណត់បិទវាបាននៅក្នុងកម្មវិធី Gemini, កម្មវិធីកាត់តវីដេអូ Flow ហើយនឹងពង្រីកទៅកាន់ Google Search នាពេលឆាប់ៗខាងមុខ។
ការកែប្រែថ្មីនេះធ្វើឡើងដើម្បីឆ្លើយតបទៅនឹងតម្រូវការរបស់អ្នកបង្កើតមាតិកា និងអ្នកជំនាញច្នៃប្រឌិត ដែលជារឿយៗជួបការលំបាកក្នុងការយកមាតិកា AI ទៅប្រើប្រាស់ក្នុងកិច្ចការងារផ្លូវការ ដោយសារតែមានសញ្ញាសម្គាល់បាំងនៅលើរូបភាព ឬវីដេអូ។ ទោះជាយ៉ាងណាក៏ដោយ Google បានបញ្ជាក់ថា ការបិទសញ្ញាសម្គាល់ដែលមើលឃើញដោយភ្នែកនេះ នឹងមិនប៉ះពាល់ដល់ប្រព័ន្ធសុវត្ថិភាពអរូប SynthID និងទិន្នន័យសម្គាល់ C2PA Standard ដែលបង្កប់ក្នុងសាច់រូបភាពនោះឡើយ។ អ្នកប្រើប្រាស់នៅតែអាចប្រើ Gemini ឬ Google Search ដើម្បីពិនិត្យមើលថា តើមាតិកានោះត្រូវបានបង្កើតដោយ AI ឬយ៉ាងណាបានដដែល។
មុខងារនេះនឹងត្រូវដាក់ឱ្យដំណើរការជាបន្តបន្ទាប់ក្នុងពេលប៉ុន្មានថ្ងៃខាងមុខនេះ ដោយអ្នកប្រើប្រាស់គ្រាន់តែចូលទៅកាន់ Settings > Media Watermark ដើម្បីជ្រើសរើសបើក ឬបិទសញ្ញាសម្គាល់បានតាមចិត្ត។ លើសពីនេះ Google ក៏បានបើកចំហកូដ (Open-source) បណ្ណាល័យថ្មីមួយឈ្មោះថា Credentio ដើម្បីអនុញ្ញាតឱ្យក្រុមអ្នកអភិវឌ្ឍន៍កម្មវិធី (Developers) អាចយកប្រព័ន្ធផ្ទៀងផ្ទាត់ភាពត្រឹមត្រូវនៃមាតិកា AI នេះទៅបង្កប់ប្រើប្រាស់នៅក្នុងកម្មវិធីផ្ទាល់ខ្លួនរបស់ពួកគេបានផងដែរ។
