ថ្មីៗ នេះ Ford ទើបតែបង្ហាញឡានអគ្គិសនីថ្មី ម៉ូដែលមួយទៀតហើយ ដោយបានសម្រេចចិត្តយកនូវម៉ូដែលឡាន Ford Explorer យកមកកែកុនថ្មី បំពាក់ជាមួយនឹងគ្រឿងអគ្គិសនី ដើម្បីធ្វើឲ្យទៅជាឡានអគ្គិសនីប្រភេទ SUV ខ្នាតកណ្ដាលថ្មីមួយទៀតដែលមានតម្លៃតិចជាង ៥ម៉ឺនដុល្លារ ខណ:ដែលបច្ចុប្បន្ន Ford មានឡានអគ្គិសនីចំនួន ៣ម៉ូដែល ដូចជា Ford lightning F-150 និង Mustang Mach-E និង Ford E-Transit ។
បើយោងតាមប្រភពពី Electrek.co បានឲ្យដឹងថា ថ្មីៗនេះ Ford ទើបបានបង្ហាញនូវឡានអគ្គិសនីថ្មីស្រឡាញមួយទៀត កាលពីថ្ងៃទី២១ ខែមីនា ឆ្នាំ២០២៣ ដែលជាឡានអគ្គិសនីប្រភេទ SUV ខ្នាតកណ្ដាល ហើយនោះគឺជា Ford Explorer ដែលក្រុមហ៊ុនបានជ្រើសរើសជាបងធំនៃឡានប្រភេទ mid-size SUV របស់ Ford ។
សម្រាប់ឡានអគ្គិសនីថ្មីនេះ Ford និយាយថា នឹងយកទៅផលិតនៅឯរោងចក្រធំ Cologne EV ប្រទេសអាល្លឺម៉ង់ ។ ជុំវិញនៃផលិតនេះដែរ Ford បានសហការគ្នាជាមួយនឹងក្រុមហ៊ុនអាល្លឺម៉ង់ Volkswagen ដោយបាននាំយកនូវ MEB Platform របស់ VW មកបំពាក់ឲ្យឡានអគ្គិសនីថ្មីរបស់ខ្លួន។
ទន្ទឹមនឹងនេះផងដែរ ការបង្ហាញរបស់ All-New-electric Vehicle Ford Explorer នឹងក្លាយជាគូរប្រជែងទីផ្សារធំរបស់ Tesla ខណ:ដែលតម្លៃរបស់ Explorer គឺមានធូរថ្លៃជាង Model Y ទៅទៀត ដោយ Ford បានសន្យាថានឹងដាក់លក់ឡានអគ្គិសនី SUV នេះនៅអឺរ៉ុបតែ ៤៨៥០០ដុល្លារតែប៉ុណ្ណោះ ។
គួរជំរាបផងដែរថា ឡានអគ្គិសនីថ្មីនេះ ជាអ្នកដើរតួរយ៉ាងសំខាន់ ដើម្បីធ្វើឲ្យ Ford អាចឈានជើងឲ្យផុតពីការផលិតឡានម៉ាស៊ីនចំហេះក្នុង ដើម្បីប្រឡោកចូលពិភពគុណឡានគ្គិសនីនៅឆ្នាំ២០៣៥ ។ហើយ Ford ក៏មានគម្រោងនឹងដាក់លក់ចេញឡានអគ្គិសនីទាំង ៩ ម៉ូដែល ឲ្យបាន ៦០ម៉ឺនគ្រឿងនៅឆ្នាំ២០២៦ ខណ:បច្ចុប្បន្ននេះ Ford មានឡានអគ្គិសនី ៣ម៉ូដែល កំពុងចរាចរណ៍ពេញទីផ្សារ៕
អត្ថបទដោយ៖ ព្រឹម ភក្តី
