យោងតាមផ្ទាំងព័ត៌មានអប់រំផ្លូវការរបស់ ក្រសួងប្រៃសណីយ៍និងទូរគមនាគមន៍ រួមជាមួយយុទ្ធនាការ កម្ពុជាឆ្ពោះទៅឌីជីថល (Go Digital Cambodia) បានបញ្ជាក់យ៉ាងច្បាស់ថា បច្ចុប្បន្នចោរព័ត៌មានវិទ្យា (Hackers) កំពុងប្រើប្រាស់ល្បិចទម្លាក់មេរោគ តាមរយៈការផ្ញើឯកសារភ្ជាប់ ដែលមានផ្នែកខាងចុង (Extension) មួយចំនួន ដើម្បីលួចទិន្នន័យ ឬដំឡើងមេរោគចូលទៅក្នុងឧបករណ៍ឌីជីថលរបស់ជនរងគ្រោះ។ ជាទូទៅ ឯកសារប្រភេទនេះតែងតែត្រូវបានជនខិលខូចបន្លំធ្វើជាឯកសារការងារ ឬរូបភាព (ឧទាហរណ៍៖ តារាងប្រាក់ខែ.exe) ជាដើម។ អ្នកប្រើប្រាស់ មិនត្រូវធ្វើការចុចបើក ឬដំណើរការ (Run) ឯកសារណាដែលមានកន្ទុយ (Extension) ដូចខាងក្រោមនេះឡើយ៖

• .exe
• .bat
• .vbs
• .ps1
• .sh
• .msi
• .scr

ហានិភ័យនៅពេលអ្នកជ្រុលដៃចុចបើកឯកសារទាំងនេះ

ឯកសារប្រភេទនេះ គឺមិនមែនជាឯកសារសម្រាប់អានទូទៅនោះទេ តែវាអាចផ្ទុកនូវមេរោគ ឬកម្មវិធីអាក្រក់ (Malware) ផ្សេងៗ។ ប្រសិនបើអ្នកចុចដំណើរការវា វានឹងបង្កហានិភ័យធ្ងន់ធ្ងរដល់ឧបករណ៍របស់អ្នកដូចជា៖

• លួចព័ត៌មានផ្ទាល់ខ្លួន៖ មេរោគអាចទាញយកទិន្នន័យសំខាន់ៗ និងឯកសារសម្ងាត់ដែលមានក្នុងកុំព្យូទ័រ ឬទូរស័ព្ទរបស់អ្នក។
• លួចពាក្យសម្ងាត់ និងគណនីធនាគារ៖ នេះគឺជាគោលដៅចម្បងរបស់ចោរព័ត៌មានវិទ្យា ដើម្បីចូលទៅគ្រប់គ្រងគណនីបណ្ដាញសង្គម និងកេងប្រវ័ញ្ចប្រាក់ពីគណនីធនាគាររបស់អ្នក។
• គ្រប់គ្រងឧបករណ៍ពីចម្ងាយ៖ ជនខិលខូចអាចចូលមកបញ្ជា និងគ្រប់គ្រងឧបករណ៍របស់អ្នកដោយសេរីពីចម្ងាយតែម្ដង។

ដើម្បីសុវត្ថិភាពទិន្នន័យ សូមកុំចុចទាញយក ឬបើកឯកសារណាដែលគួរឲ្យសង្ស័យ ទោះបីជាវាត្រូវបានផ្ញើមកពីគណនីដែលស្គាល់គ្នាក៏ដោយ (ព្រោះគណនីមិត្តភក្ដិរបស់អ្នកអាចត្រូវបានគេលួច  រួចទៅហើយដើម្បីយកមកឆបោកបន្ត)។ ត្រូវប្រាកដថា អ្នកបានពិនិត្យមើលប្រភេទផ្នែកខាងចុង (Extension) នៃឯកសារនោះឲ្យបានច្បាស់លាស់ជានិច្ច មុននឹងសម្រេចចិត្តចុចបើកវា។