ពិធីចុះហត្ថលេខាលើអនុស្សរណៈនៃការយោគយល់គ្នានេះ ធ្វើឡើងក្នុងគោលបំណង«ពង្រីកកិច្ចសហប្រតិបត្តិការក្នុងភាពជាដៃគូររវាងគ្រឹះស្ថានអប់រំទាំងពីរដើម្បីផ្សារភ្ជាប់មេរៀន និងការបង្រៀនតាមបែបទ្រឹស្តីជាមួយការអនុវត្តជាក់ស្តែងតាមប្រព័ន្ធបច្ចេកវិទ្យា ICT Online ព្រមទាំងការអភិវឌ្ឍន៍ក្រមសីលធម៌វិជ្ជាជីវៈគ្រូបង្រៀនតាមរយៈ វិជ្ជាសម្បទា បំណិនសម្បទា និងចរិយាសម្បទា របស់សិស្សានុសិស្សនៃគ្រឺះស្ថានអប់រំទាំងពីរស្រប់តាមកម្មវិធីសិក្សាសាលារៀនជំនាន់ថ្មី និងវិធីសាស្ត្របង្រៀនបែបសកម្មដែលអនុលោមតាមកម្មវិធីសិក្សាសតវត្សរ៍ទី២១ ដែលមានស្តង់ដារគុណភាពអប់រំខ្ពស់ និងជាការចូលរួមលើកកម្ពស់វិស័យអប់រំស្របតាមគោលនយោបាយរបស់រាជរដ្ឋាភិបាលកម្ពុជា»។

លោក ឈន ឈុនឡេង  ស្ថាបនិក និងជាប្រធានក្រុមប្រឹក្សាភិបាល E- School Cambodia ចាត់ទុកកិច្ចសហប្រតិបត្តិការខាងលើនេះ គឺជាការរួមចំណែកជាមួយរាជរដ្ឋាភិបាលក្នុងការលើកកម្ពស់វិស័យអប់រំកម្ពុជាតាមរយៈការបណ្ដុះបណ្ដាល អប់រំ យុវជនជំនាន់ក្រោយដែលជាអ្នកបន្តវេនដ៏មានសក្តានុពលឲ្យក្លាយជាធនធានល្អរបស់កម្ពុជា។ លោកមានប្រសាសន៍ថា តាមរយៈអនុស្សរណៈខាងលើ E- School Cambodia នឹងពង្រីកការបណ្ដុះបណ្ដាល ការអប់រំរបស់ខ្លួនបន្ថែមទៀតជូនសិស្សានុសិស្សទៅលើចំណេះដឹងខាង បច្ចេកវិទ្យា និងកម្មវិធីរៀនបែបសាលាជំនាន់ថ្មីដែលស្របទៅតាមគោលដៅរបស់រាជរដ្ឋាភិបាលកម្ពុជា ។

កន្លងមកនេះ E- School Cambodia បាននឹងកំពុងធ្វើសកម្មភាពយ៉ាងខ្លាំងក្លាក្នុងការជួយដល់សិស្សានុសិស្សសិក្សាបំប៉នបន្ថែមតាមរយៈអនឡាញ សិក្សាបន្ថែមនៅផ្ទះ ដែលជួយដល់សិស្សានុសិស្សផ្លាស់ប្តូរ ពីការប្រើស្មាតហ្វូនលេងហ្គេម មកសិក្សាបំប៉នបន្ថែមវិញ ហើយE- School Cambodia ជាមុំទី៣ ជួយដល់សិស្សានុសិស្សក្នុងការរៀនបន្ថែមពេលយប់   នេះបើតាមការបញ្ជាក់របស់ លោក លោក ឈន ឈុនឡេង។

នាយកសាលារៀនជំនាន់ថ្មីនៃវិទ្យាល័យព្រះស៊ីសុវត្ថិ(NGS)លោក សម្យ កំសាន្ត បានគូសបញ្ជាក់ថាការចុះអនុរស្សរណៈយោគយល់គ្នានេះ គឺមានទិសដៅជួយគ្នាទៅវិញទៅមក រួមគ្នាបណ្តុះបណ្តាលធនធានមនុស្ស។ លោកបានបញ្ជាក់ទៀតថា ដោយមើលឃើញពីភាពចាំបាច់នៃវិស័យអប់រំក្នុងសម័យកាលបច្ចេកវិទ្យាមានការវិវត្តខ្លាំងទើបយើងចង់អភិវឌ្ឍន៍សាលារៀនជំនាន់ថ្មីនៃវិទ្យាល័យស៊ីសុវត្ថិឲ្យមានភាពរីកចម្រើនខាងបច្ចេកវិទ្យា ដោយយើងមើលពីភាពលេចធ្លោរបស់ E-School Cambodia យើងក៏បានសហការគ្នាដើម្បីពង្រឹងវិសាលាភាពឲ្យកាន់តែខ្លាំង សម្រាប់ជាជំនួយក្នុងការរៀនសូត្របង្កើតសមត្ថភាពសិក្សារបស់សិស្សានុសិស្ស។