កាលពីថ្ងៃទី ១៥ ខែ កក្កដា ឆ្នាំ២០២៦ កន្លងទៅនេះ Google បានប្រកាសធ្វើបច្ចុប្បន្នភាពដ៏គួរឱ្យភ្ញាក់ផ្អើលមួយនៅលើកម្មវិធី Google Vids ដោយអនុញ្ញាតឱ្យអ្នកប្រើប្រាស់អាចបង្កើត «តួអង្គក្លែងធ្វើ (Digital Avatar)» ដែលមានរូបរាង និងសំឡេងដូចខ្លួនឯងបេះបិទ។ អ្វីដែលអ្នកត្រូវធ្វើ គឺគ្រាន់តែផ្ញើរូបថតសែលហ្វីចំនួន ១ សន្លឹក និងទម្លាក់សំឡេងថតរបស់អ្នកចូលទៅក្នុងប្រព័ន្ធ រួចទុកភារកិច្ចឱ្យ AI ដើរតួ ឬធ្វើបទបង្ហាញនៅក្នុងវីដេអូជំនួសមុខ ដោយមិនចាំបាច់ឱ្យអ្នកមកឈរថតនៅមុខកាមេរ៉ាផ្ទាល់ឡើយ។
ក្រុមហ៊ុនបច្ចេកវិទ្យាយក្ស Google បានប្រកាសដាក់បញ្ចូលម៉ូដែល AI ជំនាន់ថ្មី Gemini Omni ទៅក្នុងកម្មវិធី Google Vids ដោយបំពាក់បន្ថែមនូវមុខងារបង្កើតតួអង្គសិប្បនិម្មិត (AI Avatars) និងសមត្ថភាពកែសម្រួលវីដេអូកម្រិតខ្ពស់ ដើម្បីជួយឱ្យការផលិតវីដេអូកាន់តែមានភាពរហ័ស និងងាយស្រួល។
តាមរយៈការធ្វើបច្ចុប្បន្នភាពនេះ អ្នកប្រើប្រាស់អាចបង្កើត និងបញ្ជាការផលិតវីដេអូបានយ៉ាងរហ័ស ដោយគ្រាន់តែបញ្ចូលអត្ថបទបញ្ជា (Text Prompts) រួមជាមួយរូបភាពយោង ។ លើសពីនេះ Gemini Omni ក៏ដើរតួជាជំនួយការឈានមុខក្នុងការ៖
- ផ្លាស់ប្តូរ ឬលុបផ្ទៃខាងក្រោយបានភ្លាមៗ
- កែសម្រួលពន្លឺ និងគុណភាពវីដេអូដែលថតតាមទូរសព្ទដៃឱ្យប្រែជាមានស្តង់ដារខ្ពស់
- បន្ថែមស្ទីល រចនាប័ទ្ម និងផលប៉ះពាល់មើលឃើញ (Visual Effects) ផ្សេងៗទៅតាមតម្រូវការជាក់ស្តែង។
ការវិវត្តដ៏សំខាន់នេះ បានជំរុញឱ្យ Google Vids ផ្លាស់ប្តូរមុខមាត់ថ្មី ពីឧបករណ៍ជំនួយការធ្វើបទបង្ហាញធម្មតានៅក្នុងកន្លែងធ្វើការ ក្លាយទៅជាប្រព័ន្ធផលិតវីដេអូ (Video Production Platform) ដ៏ពេញលេញមួយ។
តាមរយៈការរួមបញ្ចូលមុខងារនេះទៅក្នុងកញ្ចប់សេវាកម្ម Google Workspace ក្រុមហ៊ុន Google កំពុងបង្ហាញពីយុទ្ធសាស្ត្រយ៉ាងច្បាស់លាស់ក្នុងការវាយលុកទីផ្សារអាជីវកម្មសម្រាប់ការផលិតវីដេអូបណ្តុះបណ្តាលបុគ្គលិក និងវីដេអូផ្សព្វផ្សាយផ្ទៃក្នុងស្ថាប័ន។ ការផ្លាស់ប្តូរនេះ ត្រូវបានគេមើលឃើញថាជាការបោះជំហានមួយដ៏មានឥទ្ធិពល និងអាចក្លាយជាគូប្រជែងដ៏ស្រួចស្រាវទល់នឹងកម្មវិធីផលិតវីដេអូ AI ល្បីៗនៅលើទីផ្សារបច្ចុប្បន្ន ដូចជា HeyGen, Synthesia និង Captions ជាដើម៕
