ថ្មីៗនេះ AI Startup Perplexity បានដាក់ចេញនូវឧបករណ៍ស្រាវជ្រាវ AI របស់ខ្លួនមួយដែលមានឈ្មោះថា “Deep Research” ដើម្បីជួយអ្នកប្រើប្រាស់មុខងារនេះទទួលបានចម្លើយ និងព័ត៌មានបែបស៊ីជម្រៅ ដែលអាចឆ្លើយតបទៅនឹងសំណួរគ្រប់ប្រទេសមិនថាជាសំណួរដែលមានភាពស្មុគស្មាញក៏ដោយ។ ការដាក់ដំណើរការនេះកើតឡើងបន្ទាប់ពីក្រុមហ៊ុន OpenAI និង Google បានដាក់ដំណើរការមុខងារស្រដៀងគ្នានាពេលថ្មីៗនេះផងដែរ។
យោងតាមគេហទំព័រវេបសាយផ្លូវការរបស់ Perplexity បានបង្ហោះជាសាធារណៈថា Deep Research របស់ Perplexity ដាក់ប្រើប្រាស់ជាផ្លូវការនៅថ្ងៃទី ១៤កុម្ភៈ ឆ្នាំ២០២៥ ដែលមុខងារ AI មួយនេះមានសមត្ថភាពអាចធ្វើការលើកម្រិតជំនាញដែលគិតចាប់ពីផ្នែកហិរញ្ញវត្ថុ និងទីផ្សារ រហូតដល់ការស្រាវជ្រាវផលិតផលព្រមទាំងទទួលបានពិន្ទុខ្ពស់លើ Humanity’s Last Exam ទៀតផង។ Perplexity's Deep Research ទទួលបានពិន្ទុ ២១,១% លើការធ្វើតេស្ត ដោយយកឈ្នះលើគំរូ AI Reasoning ផ្សេងទៀត រួមទាំង Grok-2 ដែលមានពិន្ទុត្រឹមតែ ៣,៨%, Gemini Thinking ដែលទទួលបានពិន្ទុ ៦,២៥% និង OpenAI's GPT-4o ដែលមានពិន្ទុ ៣,៣%។
លើសពីនេះ ឧបករណ៍ AI នេះអាចពិនិត្យមើលប្រភពកែលម្អផែនការស្រាវជ្រាវ និងបង្កើតរបាយការណ៍ក្នុងរយៈពេលត្រឹមតែ ២ ទៅ ៤នាទីលឿនជាងកិច្ចការភាគច្រើន ដែលដំណើរការដោយ OpenAI Deep Research ផងដែរ។ Deep Research សំដៅដល់មុខងារដែលបង្កើតរបាយការណ៍លម្អិតលើប្រធានបទជាក់លាក់មួយ តាមការស្នើសុំរបស់អ្នកប្រើប្រាស់។ ម៉ូឌែល AI នេះប្រើប្រាស់សមត្ថភាព "ការវិភាគ" និង "ការយល់ដឹង" ដើម្បីស្វែងរកព័ត៌មានពាក់ព័ន្ធនៅលើអ៊ីនធឺណិត ដំណើរការ និងសំយោគដែលមានប្រភពច្បាស់លាស់ជាច្រើនសម្រាប់ចូលស្រាវជ្រាវបន្ថែម។
ជម្រាបជូនអ្នកទាំងអស់គ្នាថា សម្រាប់អ្នកដែលចង់ប្រើប្រាស់មុខងារ Deep Research របស់ Perplexity អាចវាយពាក្យ Perplexity.com នៅលើ Google ឬ Browser បន្ទាប់មករើសយកពាក្យ Deep Research និងភ្ជាប់ជាមួយគណនី Google របស់អ្នកទាំងអស់គ្នារួចជាការស្រេច និងអាចប្រើបានដោយឥតគិតថ្លៃ។
គូសបញ្ជាក់ដែរថា មុខងារនេះមិនត្រឹមតែមានប្រយោជន៍សម្រាប់អ្នកសិក្សា ឬអ្នកស្រាវជ្រាវប៉ុណ្ណោះទេ ថែមទាំងអាចជួយអ្នកប្រើប្រាស់ឱ្យទទួលបានការសិក្សាបែបស៊ីជម្រៅលើប្រធានបទ និងព័ត៌មានទាំងអស់ដែលអ្នកប្រើប្រាស់ត្រូវការ។
អត្ថបទដោយ៖ ងួន ឃុនណា
