តាមការបង្ហោះនៅលើផេកផ្លូវការរបស់ក្រុមហ៊ុន Changan ប្រចាំប្រទេសកម្ពុជាកាលពីថ្ងៃទី ២៦ ខែមីនាឆ្នាំ ២០២៤ កន្លងទៅ ក្រុមហ៊ុនចាប់ផ្ដើមបើកទទួលកក់ឡានអគ្គិសនី Changan Deepal S7 ហើយជាមួយនឹងយុទ្ធនាការទីផ្សារដាក់ផ្ទាំងពាណិជ្ជកម្មនៅបណ្ដាមហាវិថីមួយចំនួនផងនោះ។
យ៉ាងណាក្រុមហ៊ុនមិនបានលម្អិតឱ្យដឹងនៅឡើយទេថា ឡានដែលនឹងនាំចូលមកនេះមានកម្រិតមុខងារ ថ្ម ឬ តម្លៃបែបណានោះទេ គ្រាន់តែគេដឹងថាកន្លងទៅកាល Deepal S7 ប្រកាសចេញនៅចិនតម្លៃចាប់ផ្ដើមពី ២០៨០០ដុល្លារឡើងទៅរហូតដល់ខ្ទង់ ៣ម៉ឺនដុល្លារនេះបើតាមការចុះផ្សាយពីគេហទំព័រសារព័ត៌មានឡានចិន CarNewsChina។
សម្រាប់រថយន្តអគ្គិសនី Deepal S7 នេះជាគម្រោងអភិវឌ្ឍរួមគ្នារវាងក្រុមហ៊ុន ៣ មានដូចជា Changan Huawei និង CATL។
ឡានប្រភេទ SUV ធុនកណ្ដាលនេះកន្លងមកនៅប្រទេសចិនមានកម្រិតថ្មចន្លោះពី ៦៦.៨ kWh ទៅដល់ ៧៩.៩៧ kWh សាកម្ដងអាចបើកបរចន្លោះខ្ទង់ ៥២០គីឡូម៉ែតដល់ខ្ទង់ ៦២០គីឡូម៉ែត្រ។
ចំពោះ Specs ឡានដែល Changan Cambodia នឹងនាំយកមកកម្ពុជាលម្អិតយ៉ាងណាខ្លះនោះ ចាបខៀវនឹងលម្អិតជូននៅពេលក្រោយ ពេលមានព័ត៌មានពីក្រុមហ៊ុន។
គូសបញ្ជាក់ផងដែរថា កាលពីជំនួបអ្នកប្រើប្រាស់រថយន្ត Changan នៅកម្មវិធី Morning Coffee ប្រចាំត្រីមាសរបស់ខ្លួននោះ លោកលោក ហៃ ពុទ្ធារតន៍ ជា Brand Manager របស់ក្រុមហ៊ុន Changan Cambodia ក៏ធ្លាប់បង្ហើបអំពីការត្រៀមខ្លួននាំយកនូវប្រភេទឡានអគ្គិសនីមកកាន់កម្ពុជាដែរ គ្រាន់តែពេលនោះលោកមិនបានបញ្ជាក់ឱ្យច្បាស់ថាម៉ូដែលណាមួយ។