បងប្អូនទាំងអស់គ្នាប្រាកដជាស្គាល់ឡានដែលអ្នកអភិជនពេញនិយមជិះច្រើនជាងគេហើយ គឺ Mercedes-Benz G-class ភាគច្រើនឡានប្រភេទនេះ ត្រូវបានក្រុមហ៊ុនដទៃ Clone ចេញជារូបរាងផលិតតាមជាហូរហែ ដូចជាឡានចិន Cybertank 300 នេះអ៊ីចឹង គឺថាររូបរាងស្រដៀងគ្នាមែនទែន ប៉ុន្តែបើនិយាយរឿងតម្លៃធូរថ្លៃជាង G-Class ឆ្ងាយណាស់។
បើយោងតាមចេញផ្សាយពីគេទំព័រ autoblog បានឲ្យដឹងថា នេះជាឡានចិនឈ្មោះ Cybertank 300 ដែលជាប្រភេទឡាន SUV ដោយវាមានរាងជា Body-On-Frame ។ ឡាននេះត្រូវបានផលិតដោយក្រុមហ៊ុន Great Wall Motor ប៉ុន្តែកាលពីមុនឡាននេះនៅក្រុមការគ្រប់គ្រងរបស់យីហោ WAY ក្រោយមកទៀត Great Wall Motor បានផ្តាច់ចេញ Cybertank 300 ឲ្យនៅឯករាជ្យ និងបានពង្រីកឡានប្រភេទនេះបន្តទៀត។
យ៉ាងណាមិញ ឡាននេះ ត្រូវបានបំពាក់ជាមួយនឹងម៉ាស៊ីនតូចដូចអាព្រូសអ៊ីចឹងត្រឹមតែ 2.0លីត្រនោះទេ ដោយអាចបង្កើតកម្លាំងបាន 227hp និងកម្លាំងរមូរ 387Nm ប្រើប្រាស់ប្រអប់ ៨វគ្គអូតូ ដំណើរការដោយប៉ុង២ ។
ចំពោះរូបរាងខាងក្រៅរបស់ឡាននេះថ្វីត្បិតមានភាពស្រដៀងនឹង G-Class ប៉ុន្តែការឌីហ្សាញ ទាក់ទាញខ្លាំងមែនទែន ជាពិសេសទៅលើការតុបតែងចង្កៀង LED ផ្នែកពីមុខ មានរាងមូលៗ បែប Classic កាត់ សម័យ ដោយបង្កប់នូវអំពូល LED ២ គ្រាប់សងខាង និងផ្នែកខាងក្រោយក៏មានភ្លើងស្តុបមានស៊ុមរាងប្រអប់ បង្កប់នូវបន្ទាត់២ ឆ្នូត ។
ចំណែកឯផ្នែកខាងក្នុងវិញ យើងឃើញថាមានតែ ៣ ពណ៌ទេ គឺ ពណ៌ស ប្រាក់ និងខ្មៅ សូម្បីតែចង្កូតក៏ជាពណ៌សដែរ ស្អាតខ្លាំង ប៉ុន្តែវារាងឆាប់ប្រលាក់បន្តិច បើហ៊ានតែមកខ្មែរ ជិះឡាននេះបានទាល់តែសម្អាតខ្លួនឲ្យស្អាត និងពាក់ស្រោមដៃការពារកុំឲ្យប្រលាក់ ។
សម្រាប់ ឡាន Cybertank 300 នេះមានតម្លៃប្រមាណជាង ៤៩០០០ដុល្លារនៅក្នុងប្រទេសចិន។ អ្នកទាំងអស់ចាប់អារម្មណ៍ទេ បើមានគេនាំចូលមកស្រុកខ្មែរគិតថា គួរតែទិញឬអត់ សុំយោបល់ម្នាក់មួយមក៕
អត្ថបទដោយ៖ ព្រឹម ភក្តី
