ជាទូទៅ ការថែទាំម៉ូតូឲ្យបានល្អ ម៉ាស៊ីននៅតែខ្លាំងមិនងាយរត់ស្ទុក និងមិនងាយនឹងចូលជាងញឹក ចាំបាច់ណាស់បងប្អូនទាំងអស់គ្នាមិនគួរមើលរំលង ឬត្រួតពិនិត្យទៅលើ ប្រេងម៉ាស៊ីនរបស់ម៉ូតូលោកអ្នកឡើយ ក៏ដូចជាការប្តូរប្រេងម៉ាស៊ីនឲ្យបានទៀតទាន់ទៅតាម លក្ខណ:បច្ចេកទេសដែលបានកំណត់សម្រាប់ម៉ូតូតាមប្រភេទនីមួយៗ។
ដូច្នេះសម្រាប់ថ្ងៃនេះដែរ យើងនឹងមកនិយាយពាក់ព័ន្ធនៃការប្តូរប្រេងម៉ាស៊ីនលើម៉ូតូរបស់ម៉ាក Honda របស់ ក្រុមហ៊ុន NCX ទាំងពីរប្រភេទ គឺ ម៉ូតូប្រើប្រអប់លេខ និងម៉ូតូលេខអូតូ ថាតើការប្តូរប្រេងម៉ាស៊ីន ១ខែម្តង ត្រូវតាមស្តង់ដារ ម៉ាស៊ីនដើរស្រួល ស៊ីសាំងតិច និងត្រូវតាមលក្ខណ: បច្ចេកវិទ្យាដូចដែលគេនិយាយដែរឬយ៉ាងណា?
បើយោងតាមវិដេអូបកស្រាយពីការប្តូរប្រេងម៉ាស៊ីនរបស់ NCX បានឲ្យដឹងថា ការប្តូរប្រេងម៉ាស៊ីនឲ្យបានល្អ ទៅតាមស្តង់ដារបស់ក្រុមហ៊ុនផ្ទាល់ គឺមិនត្រូវបានកំណត់ឲ្យ ១ខែ ត្រូវប្តូរម្តងឡើយ ពោលគឺតម្រូវឲ្យប្តូរទៅតាមចម្ងាយគីឡូម៉ែត្រដែលបានប្រើប្រាស់។ ជាក់ស្តែង សម្រាប់ម៉ូតូថ្មីខ្លាញ់គោ ខាងក្រុមហ៊ុនតម្រូវឲ្យប្តូរប្រេងម៉ាស៊ីនជាលើកទី១ ក្រោយពីជិះបាន ១០០០ គ.ម ប៉ុន្តែសម្រាប់ការប្តូរប្រេងម៉ាស៊ីនជាលើកទី២ ក្រោយពេលជិះបាន ៦០០០ គ.ម ឯណោះ។
ហើយសម្រាប់ការប្តូរប្រេងម៉ាស៊ីនឲ្យបានទៀងទាត់ គឺមានសារ:សំខាន់សម្រាប់ម៉ូតូខ្លាំងមែនទែន ជាពិសេសធ្វើឲ្យម៉ាស៊ីនម៉ូតូមានសុខភាពល្អ មិនងាយឲ្យម្ចាស់ម៉ូតូបណ្តើររកជាងញឹក និងជួយធ្វើឲ្យម៉ូតូដើរស្រួល មានសន្ទុះ ព្រមទាំងជួយស៊ីសាំងតិចផងដែរ។
ផ្ទុយទៅវិញប្រសិនជា សម្រាប់ហានិភ័យដែលបណ្តាលមកពីខ្វះការត្រួតពិនិត្យ និងប្តូរប្រេងម៉ាស៊ីនឲ្យបានត្រឹមត្រូវ និងមិនប្រើប្រេងម៉ាស៊ីនរបស់ក្រុមហ៊ុន Honda ដែលបានកំណត់មក អាចនឹងប្រឈមនឹងបញ្ហាដូចជា៖
- ម៉ូតូរត់ស្ទុកៗ បើម៉ូតូលេខអូតូរត់បែបកន្ត្រាក់ៗ
- -ម៉ាស៊ីនរត់មិនសូវស្ទុះ
- -ម៉ាស៊ីនងាយនឹងឆាប់ចេញផ្សែង
- -ស៊ីសាំងច្រើនជាងមុន
- -ធ្វើឲ្យសឹករេចរឹលក្រវ៉ាក់ពិស្តុង ឬទួងស្បែក អំប្រ៊ីយ៉ា
- និងពេលដែលលក់ចេញវិញទទួលបានតម្លៃទាបជាងទីផ្សារ និយាយរួមគឺខាតច្រើន។
យ៉ាងណាមិញ បើយោងតាមសម្តីរបស់ជាងម៉ូតូ តាមសធារណ: ហៅថា ជាង សេង មានទីតាំងក្បែរស្តុបសំណង់១២ គាត់បានលើកឡើងថា “ការប្តូរប្រេងម៉ាស៊ីន យើងមិនអាចជិះលើសអ្វីដែលគេបានកំណត់នៅលើការណែនាំរបស់ប្រេងរំអិលតាមម៉ាកនីមួយឡើយ។ បើមើលជាក់ស្តែងយើងមិនអាចប្រើដល់កម្រិតនោះបានឡើយ ព្រោះថា ម៉ូតូយើងជិះរាល់ថ្ងៃ សារធាតុរំអិលកាត់បន្ថយទៅតាមនឹងដែរ ដូច្នេះគាត់បានណែនាំ ឲ្យជិះខ្ទង់យ៉ាងតិច ១៣០០គ.ម ត្រូវមកធ្វើការប្តូរប្រេងម៉ាស៊ីនម្តង បើចង់ថែរក្សាម៉ូតូនៅមានគុណភាពល្អដូចទិញថ្មី ។
ដោយឡែក ក្នុងករណីមួយទៀត លោកអ្នកអាចត្រួតពិនិត្យជាតិរំអិលក្នុងប្រេងម៉ាស៊ីនរបស់ម៉ូតូលោកអ្នកបានដោយខ្លួនឯងផ្ទាល់ គ្រាន់តែសម្គាល់មើលលើពណ៌នៃប្រេងរំអិល។ ចំណុចទី១ ប្រសិនជាប្រេងនៅមាន“សភាពថ្លា”មានន័យថា ជាតិរំអិលមានគ្រប់គ្រាន់ មិនចាំបាច់ប្តូរឡើយ ។ ចំណុចទី២ បើប្រេងរំអិលនោះមានពណ៌ស្រអាប់តិចៗ មានន័យថា ជាតិរំអិលនៅធម្មតាអាចប្រើការបាន ។ ចុចក្រោយជា ចំណុចទី៣ ប្រេងរំអិលមានពណ៌ខ្មៅដិត មានន័យថា ជាតិរំអិលទាបខ្លាំង ត្រូវធ្វើការផ្លាសញ់ប្តូរចេញ បើមិនដូច្នេះទេ អាចនឹងមានហានិភ័យដូចដែលរៀបរាប់ខាងលើ៕
ប្រភពពី៖ https://youtu.be/ozxrb1UVNog
អត្ថបទដោយ៖ ព្រឹម ភក្តី
