កាលពីថ្ងៃទី ១៩ ខែកញ្ញា ឆ្នាំ២០២៥ - ក្រុមហ៊ុន TH Automotive Manufacturing Co., Ltd., បានប្រកាសពីសមិទ្ធផលដ៏សំខាន់ ដោយក្រុមហ៊ុនទទួលបានផ្លូវការនូវអាជ្ញាប័ណ្ណប្រតិបត្តិការរោងចក្រដំឡើងយានយន្តនៅកម្ពុជា។
រោងចក្រតម្លើងរថយន្ត GAC នឹងសាងសង់លើផ្ទៃដី ១១ ហិកតា ក្នុងទំហំទឹកប្រាក់ប្រមាណ ១៩ លានដុល្លារ ស្ថិតនៅទីរួមខេត្តកំពង់ឆ្នាំង។ នេះជាដំណឹងល្អក្នុងការបង្កើតឱកាសការងារក្នុងរោងចក្រ ដល់ប្រជាពលរដ្ឋខ្មែរប្រមាណពី ៤០០ ទៅ ៦០០ កន្លែង។ ជាពិសេសក្នុង ១ ឆ្នាំរោងចក្រមួយនេះ មានសម្ថភាពអាចតម្លើងរថយន្តបានដល់ទៅ ១៥,០០០ គ្រឿង។ ការសាងសង់មួយនេះនឹងរំពឹងថាបញ្ចប់នៅចុងឆ្នាំ ២០២៥ ហើយនឹងចាប់ផ្តើមផលិតទ្រង់ទ្រាយធំនៅដើមឆ្នាំ ២០២៦ នេះផងដែរ។
ការទទួលបានអាជ្ញាប័ណ្ណនេះបង្ហាញពីភាពរីកចម្រើនគួរឲ្យកត់សម្គាល់របស់កម្ពុជាក្នុងការទាក់ទាញការវិនិយោគលើឧស្សាហកម្មដំឡើងយានយន្ត និងបង្ហាញពីទំនុកចិត្តរបស់ក្រុមហ៊ុនអន្តរជាតិលើសក្តានុពលទីផ្សារនិងបរិយាកាសវិនិយោគនៅកម្ពុជា។
គូសបញ្ជាក់ផងដែរថា ការវិនិយោគនេះមិនត្រឹមតែបង្កើនសមត្ថភាពផលិតកម្មក្នុងស្រុកប៉ុណ្ណោះទេ តែក៏ជួយដល់ការផ្ទេរបច្ចេកវិទ្យា និងលើកកម្ពស់ជំនាញរបស់ពលរដ្ឋខ្មែរក្នុងវិស័យឧស្សាហកម្មថ្មីនេះផងដែរ។
