ជាទូទៅបញ្ហាទាំងអស់សុទ្ធសឹងតែមានដំណោះស្រាយ ជាក់ស្ដែងពិភពលោកកំពុងស្ថិតក្នុងស្ថានភាពអាក្រក់ ដែលតម្លៃប្រេងសាំងឡើងថ្លៃ តែមិនជាបញ្ហានោះទេ ខណ:ពេលនេះដែរខ្ញុំណែនាំលោកអ្នកមកស្គាល់រថយន្ត EV មួយប្រភេទរបស់ក្រុមហ៊ុន BYD ដែលមានទីផ្សារនៅស្រុកខ្មែរស្រាប់ នោះគឹ BYD e2 ។
រថយន្ត EV របស់ BYD ម៉ូដែល e2 មួយនេះជាប្រភេទរថយន្ត Hatchback (អាចបត់កៅអីក្រោយ យកកន្លែងធំសម្រាប់ដាក់ឥវ៉ាន់បានច្រើន) ៥ កៅអី ។ e2 ត្រូវបានគេបំពាក់មកជាមួយកម្លាំងម៉ូទ័រអគ្គិសនី ៧០ គីឡូវ៉ាត កម្លាំងរមួល ១៨០ ញូតុនម៉ែត្រ អាគុយផ្ទុកអគ្គិសនីទំហំ ៣៥.២ គីឡូវ៉ាត់ម៉ោង អាចបើកបរចម្ងាយ ៣០៥ គីឡូម៉ែត្រ រាល់ពេលសាកភ្លើងពេញម្ដង លើសពីនេះរាល់ការសាកថ្មចាប់ពី ៣០% - ៨០% ប្រើពេលតែ កន្លះម៉ោងតែប៉ុណ្ណោះ ។
យោងតាមការឈែតសួរទៅកាន់ BYD Cambodia បានប្រាប់មកថា ក្រុមហ៊ុននឹងផ្ដល់ជូននូវ កញ្ចប់ខ្សែសាកភ្លើងនៅតាមគេហដ្ឋានមកជាមួយស្រាប់ ដើម្បីងាយស្រួលដល់លោកអ្នកមិនចំណាយពេលទៅក្រៅសាកថ្មឡើយ។ ចំពោះការសាកថ្មនៅផ្ទះក្រុមហ៊ុនបានបញ្ជាក់មកទៀតថា ក្នុងការសាកថ្មពេញម្ដងចំណាយពេលត្រឹមតែ ៥ ម៉ោងទេ។
ចំណែកផ្នែកខាងក្នុងវិញត្រូវបានរចនាមកជាមួយទំហំអេក្រង់កុងទ័រ ប្រភេទឌីជីថល ដែលបង្ហាញនូវព័ត៌មានជាច្រើនយ៉ាងច្បាស់ និងងាយស្រួលមើល ដែលបង្ហាញពីមុខងារបើកបរ Drive mode ដូចជា Sport Mode, Snow Mode និង Eco Mode គួបផ្សំនឹងអេក្រង់ Touchscreen ទំហំដល់ 8 អ៊ីញ អាចកម្សាន្តតន្រ្តី និងមានប្រព័ន្ធមើល Map បានយ៉ាងល្អ។
ម្យ៉ាងវិញទៀត មានប្រព័ន្ធសុវត្ថិភាពជាច្រើន ដូចជា ហ្រ្វាំង ABS, ហ្វ្រាំង Electronic Brakeforce Distribution, ហ្វ្រាំងដៃអូតូ Auto Hold មុខងារជំនួយពេលឡើងចំណោត Hill-Hold Control, មុខងារទប់លំនឹង Traction Control System ប្រព័ន្ធហ្វ្រាំងជំនួយ Hydraulic Brake Assist System, មុខងារទប់លំនឹង Vehicle Dynamic Control ផងដែរ។
ចំណុចកាន់តែពិសេសរបស់ម៉ូដែល e2 នោះគឺ សន្សំសំចៃថវិកាបានខ្ពស់ ១០០គីឡូវម៉ែត្រ ចំណាយតែ ២ដុល្លារនោះទេហើយតម្លៃរបស់ម៉ូដែល BYD e2 នេះ នៅក្នុងស្រុកខ្មែរក្រោម ៣ម៉ឺនដុល្លរនោះទេ ៕
អត្ថបទដោយ៖ ព្រឹម ភក្ដី
