កៀករដូវភ្ជុំបិណ្ឌនេះ មនុស្សម្នាជាច្រើននាក់ បាននឹងកំពុងត្រៀមខ្លួនរួចជាស្រេច ក្នុងការធ្វើដំណើរទៅលេងស្រុកកំណើតរបស់ខ្លួន។ មានបងប្អូនមួយចំនួន បានប្រើប្រាស់យានជំនិះដោយខ្លួនឯង និងខ្លះទៀតត្រូវជិះរថយន្តឈ្នួលផ្សេងៗ ព្រោះផ្ទះនៅតាមខេត្តឆ្ងាយៗជាដើម។
ថ្ងៃនេះ Technology Cambodia នឹងណែនាំ App របស់ក្រុមហ៊ុនដឹកជញ្ជូនចំនួន៣ សម្រាប់អ្នកចង់ធ្វើដំណើរទៅលេងស្រុកកំណើត នៅតាមបណ្ដាខេត្តជិតឆ្ងាយ អាចធ្វើការកក់សំបុត្រឡានតាមទូរស័ព្ទបាន ដោយពុំចាំបាច់ទៅតម្រង់ជួររង់ចាំទិញ នាំតែចុកជើងឡើយ។ App ទាំង៣នេះរួមមាន៖
១. VET Express : នេះគឺជា App របស់ក្រុមហ៊ុនបញ្ញើ និងដឹកជញ្ជូន វីរៈប៊ុនថាំ ដែលធ្វើឡើងសម្រាប់អតិថិជន ធ្វើការកក់សំបុត្ររថយន្ត ធ្វើដំណើរទៅកាន់ខេត្តចំនួន២៤ខេត្តក្រុង ក្នុងព្រះរាជាណាចក្រកម្ពុជា។ មិនត្រឹមតែក្នុងប្រទេសកម្ពុជាទេ លោកអ្នកក៏អាចកក់សំបុត្រទៅលេងនៅប្រទេសក្បែរខាងកម្ពុជា ដូចជានៅថៃ វៀតណាមបានទៀតផង។ សម្រាប់អ្នកចង់កក់សំបុត្រឡានរបស់វីរៈប៊ុនថាំ អាចចូលទៅទាញយក App បានទាំងនៅលើ App Store និង Play Store។
២. BookMeBus : App របស់កូនខ្មែរមួយនេះ ក៏កំពុងទទួលបានការប្រើប្រាស់យ៉ាងពេញនិយម ពីសំណាក់អ្នកចូលចិត្តធ្វើដំណើរកំសាន្ត។ ក្រៅពីកក់សំបុត្រធ្វើដំណើរកំសាន្ត ក្នុងឱកាសពិធីបុណ្យភ្ជុំបិណ្ឌនេះ លោកអ្នកក៏អាចកក់សំបុត្រឡាន ធ្វើដំណើរទៅលេងស្រុកកំណើតតាមរយៈ App BookMeBus បានដូចគ្នា ដោយក្នុងនោះលោកអ្នកអាចធ្វើដំណើរបានស្ទើរតែគ្រប់ខេត្តក្រុង ក្នុងប្រទេសកម្ពុជាយើង។ ចង់បាន App អាចចូលទៅទាញយកបាន នៅលើ App Store និង Play Store។
៣. Larryta Express : App មួយនេះលោកអ្នកអាចទាញយកបាន សម្រាប់ការកក់សំបុត្រធ្វើដំណើរទៅខេត្តព្រះសីហនុ និងខេត្តសៀមរាបប៉ុណ្ណោះ ប៉ុន្តែមិនមានបណ្ដាខេត្តផ្សេងៗឡើយ។ ដូច្នេះសម្រាប់អ្នកដែលត្រូវធ្វើដំណើរ ភ្នំពេញ-សៀមរាប និង ភ្នំពេញ-ព្រះសីហនុ អាចចូលទៅកក់សំបុត្របាន នៅក្នុង App Larryta Express។ ទាញយកបាននៅលើ App Store និង Play Store។
សូមបញ្ជាក់ថា ក្រៅពី App ៣ខាងលើនេះ ក៏នៅមាន app ជាច្រើនទៀត ដែលយើងអាចកក់សំបុត្របានបែបនេះបាន៕
អត្ថបទដោយ៖ ផែន ផាន់ណា
