SAS ជាក្រុមហ៊ុនអាកាសចរណ៍ដែលបានបង្កើតឡើងតាំងពីឆ្នាំ១៩៤៦ មកម្លេះ ដោយឡែកថ្មីៗនេះ SAS បានជូនដំណឹងជាសាធារណថា យន្តហោះដើរដោយថាមពលអគ្គិសនីរបស់ខ្លួន បានបើកឲ្យកក់សំបុត្រ ចាប់ពីថ្ងៃទី២ ខែមិថុនា ឆ្នាំ២០២៣ តទៅ នេះបើយោងតាមការចេញផ្សាយពី electrek.co ។
ប្រភពដដែលបានឲ្យដឹងទៀតថា SAS នឹងនាំយកយន្តហោះឈ្មោះថា ES-30 ដំណើរការដោយថាមពលអគ្គិសនីរបស់ Heart Aerospace របស់ប្រទេសស៊ុយអែត យកមកបម្រើលើឧស្សាហគម្មអាកាសចរណ៍ នឹងដាក់ឲ្យដំណើរការនៅឆ្នាំ២០២៨ ខាងមុខ ហើយចំពោះយន្តហោះនេះ អាចដាក់មនុស្សបាន ៣០នាក់ រួមទាំងអ្នកបើកយន្តហោះផងដែរ។
ជាមួយគ្នានេះផងដែរ យន្តហោះអគ្គិសនី ES-30 ត្រូវបានបំពាក់ម៉ូទ័រអគ្គិសនីចំនួន ៤គ្រឿង និងការហោះបានចម្ងាយ 200Km ដោយគេមិនបញ្ជាក់ពីទំហំថ្មដែលបានភ្ជាប់មកជាមួយយន្តហោះឡើយ។
ម្យ៉ាងវិញទៀត គេបានអះអាងថា ការហោះបានចម្ងាយប៉ុណ្ណេះ សមស្របជាមួយនឹងការហោះក្នុងតំបន់ទៅមក ជាមួយនឹងការសាកថ្មល្បឿនលឿន 30នាទី ព្រមទាំងជួយសម្រួលដល់ការធ្វើដំណើរឲ្យកាន់លឿនជាងមុន នឹងមានសុវត្ថិភាពខ្ពស់។
គួរជំំរាបផងដែរ សម្រាប់សំបុត្រយន្តហោះអគ្គិសនីនេះ ត្រូវបាន SAS ប្រកាសលក់តែ ៣០សន្លឹកតែប៉ុណ្ណោះសម្រាប់បើកថ្ងៃដំបូង ដោយសំបុត្រ ១សន្លឹកតម្លៃ ១៧៩ដុល្លារតែប៉ុណ្ណោះ ហើយសម្រាប់អ្នកដែលបានកក់សំបុត្របានហើយត្រូវរងចាំដល់ថ្ងៃដែលគេដាក់ដំណើរការជាផ្លូវការ នៅឆ្នាំ២០២៨ ៕ នេះជាតំណភ្ជាប់សម្រាប់កក់សំបុត្រ៖ https://www.flysas.com/
អត្ថបទ៖ ព្រឹម ភក្តី
