បើយោងតាមក្រសួងឧត្តុនិយមថៃ ចេញផ្សាយដោយកាសែត nationthailand បានឲ្យដឹងថា នៅថ្ងៃទី២៧ ខែមេសា ឆ្នាំ២០២៣ ម៉ោង១២:១៦រសៀល នឹងមានបាតុភូមិកម្រមួយកើតឡើងក្នុងទីក្រុងបាងកក ដែលគេហៅថា Zero Shadow ឬថ្ងៃគ្មានស្រមោល។
ប្រភពដដែលបានបានបន្តថា បាតុភូតនេះកើតឡើងព្រោះព្រះអាទិត្យនៅត្រង់ពីលើទីក្រុងបាងកក។ នៅពេលបាតុភូតនេះកើតមានឡើង គឺមនុស្សមិនអាចមើលឃើញស្រមោលវត្ថុដែលបញ្ឈរដូចជា ស្រមោលដើមឈើ អគារ បង្គោល និងរបស់ផ្សេងៗទៀត។ ទោះបីជាយ៉ាងនេះក្ដី ក៏បាតុភូតនេះអាចកើតមានឡើងត្រឹមតែ២ទៅ៣នាទីប៉ុណ្ណោះ មុនពេលព្រះអាទិត្យ រំកិលទៅចំណុចផ្សេង។
បើតាមក្រសួងឧត្តុនិយមថៃក៏បានបញ្ជាក់ផងដែរថា នៅក្នុងប្រទេសថៃគឺអាចមានកើតឡើងនូវបាតុភូតបែបនេះ២ដងក្នុងមួយឆ្នាំ ពោលបើមិននៅក្នុងខែមេសាដល់ឧសភា ក៏ក្នុងខែកក្កដាដល់សីហាដែរ។ មួយវិញទៀតវាក៏មិនបានបន្ថែមសីតុណ្ហភាព ឬកំដៅខ្លាំង ដល់ប្រទេសថៃនោះដែរ៕
អត្ថបទដោយ៖ ផែន ផាន់ណា
