យោងតាមការចុះផ្សាយរបស់សារព័ត៌មាន BBC កាលពីពេលថ្មីៗនេះ ក្រុមហ៊ុន ByteDance ដែលជាក្រុមហ៊ុនមេរបស់ TikTok បានអះអាង ពីការយល់ព្រមឲ្យរដ្ឋាភិបាលអាមេរិកអាចធ្វើការបិទ TikTok ដែលជាផ្លែតហ្វមវីដេអូខ្លីរបស់ខ្លួន ដើម្បីកុំដោះស្រាយកង្វល់សន្ដិសុខជាតិ និងការពារទិន្នន័យឯកជនរបស់អ្នកប្រើប្រាស់នៅសហរដ្ឋអាមេរិក ក្រោយពី TikTok បានធ្វើការប្ដឹងប្ដល់តវ៉ាជាមួយសហរដ្ឋអាមេរិកអស់រយៈពេលជាច្រើនខែ។
ប្រភពដដែលបានឲ្យដឹងទៀតថា សម្រាប់ការយល់ព្រមបើកភ្លើងខៀវពី TikTok នេះ គឺសំដៅការផ្ដល់នូវសិទ្ធអំណាចដល់រដ្ឋាភិបាលអាមេរិក ដោយមានសិទ្ធសម្រេចចិត្ត និងអនុវត្តន៍ច្បាប់បិទ TikTok ដែលបានបង្កើតឡើងតាំងតែពីឆ្នាំ២០២២។ សម្រាប់ការបង្កើតច្បាប់នេះឡើង គឺដោយសារតែអាមេរិកមានការព្រួយបារម្ភចំពោះសុវត្ថិភាពទិន្នន័យឯកជនរបស់អ្នកប្រើប្រាស់អាមេរិក ពោលគឺខ្លាចក្រុមហ៊ុន ByteDance ដែលជាក្រុមហ៊ុនមេរបស់ TikTok អាចនឹងចែករំលែកទិន្នន័យអ្នកប្រើប្រាស់អាមេរិកទៅកាន់រដ្ឋាភិបាលចិន។ យ៉ាងណាក៏ដោយ ខាងក្រុមហ៊ុន ByteDance តែងតែធ្វើការបដិសេធ និងបានធានាថាមិនមានការចែករំលែកទិន្នន័យទៅកាន់រដ្ឋាភិបាលចិននោះឡើយ។
ជាមួយគ្នានេះដែរ តាមការអះអាងខាងលើរបស់ TikTok គឺជាការអនុញ្ញាតឱ្យរដ្ឋាភិបាលអាមេរិកមានសិទ្ធិអំណាច ក្នុងការបិទផ្លែតហ្វមវីដេអូខ្លី TikTok លែងឲ្យដំណើរការនៅសហរដ្ឋអាមេរិក ដោយផ្អែកទៅតាមការសម្រេច របស់រដ្ឋាភិបាលសហរដ្ឋអាមេរិកផងដែរ។
គួរជម្រាបថា បច្ចុប្បន្ននេះ TikTok មានអ្នកប្រើប្រាស់នៅអាមេរិកប្រមាណ ១៧០លាននាក់ ខណៈចំណូលសរុបដែល TikTok រកបានពីទីផ្សារអាមេរិកកាលពីឆ្នាំ២០២៣កន្លងទៅ គឺមានរហូដល់ទៅ ១៣ពាន់លានដុល្លារឯងណោះ។ យ៉ាងណាមិញកាលពីពេលថ្មីៗនេះ រដ្ឋាភិបាលអាមេរិកបានចេញច្បាប់បង្ខំឲ្យក្រុមហ៊ុន ByteDance ដែលជាក្រុមហ៊ុនមេ TikTok ត្រូវតែលក់ក្រុមហ៊ុន TikTok ទៅជនជាតិអាមេរិក ឬជម្រើសទីពីរក្រៅពីការលក់ គឺការត្រូវបិទចោលតែម្ដង៕