ទិន្នន័យចុងក្រោយពីសារព័ត៌មាន Insider បានបង្ហាញថា ក្នុងមួយឆ្នាំនេះភាគហ៊ុនរបស់ក្រុមហ៊ុន Tesla បាត់តម្លៃរហូតដល់ទៅ ៥៣% ដែលកន្លងមក Elon បំបុកតម្លៃក្រុមហ៊ុនទាំងមូលឱ្យឡើងមានតម្លៃរហូតដល់ចំណុចខ្ពស់បំផុត ១.២ ទ្រីលានដុល្លារឯណោះ។

តាមការវិភាគកន្លងទៅតម្លៃភាគហ៊ុនរបស់ Tesla ទំនងជារងការប៉ះពាល់ដោយសារតែ ការសម្រុកលក់ភាគហ៊ុនចេញពីសំណាក់វិនិយោគិន ក្នុងកាលៈទេសៈសេដ្ឋកិច្ចពិភពលោកស្ថិតក្នុងភាពមិនច្បាស់លាស់ ផ្សំជាមួយការអូសបន្លាយនៃអតិផរណា និង ការកើនឡើងនៃអត្រាការប្រាក់។

បន្ថែមពីនេះទៅទៀត តម្លៃភាគហ៊ុនរបស់ Tesla កន្លងមកក៏មានសភាពឡើងប៉ោងតម្លៃខុសប្រក្រតីផងដែរ ដោយសារកត្តាជាច្រើន ហើយកត្តាមួយក្នុងចំណោមនោះគឺ ជាភាពប៉ិនប្រសប់ក្នុងការទាញអារម្មណ៍មនុស្សម្នាពីសំណាក់សេដ្ឋីល្បីពូកែកូរ Elon Musk នោះឯង ជាហេតុងាយឱ្យតម្លៃងាយស្រកចុះមកវិញផងដែរ។

ជាចុងក្រោយកត្តាធ្លាក់ចុះមួយទៀតនោះគឺលោក Musk បានធ្វើការទិញ Twitter ក្នុងតម្លៃ ៤៤ពាន់លានដុល្លារ ហើយឆ្លៀតលក់ភាគហ៊ុន Tesla ប្រមាណ ៤ពាន់លាន$ ទៀតចេញផងដែរ៕

អត្ថបទដោយ៖ ខុន សក្ក័ដា