ស្របពេលស្ថានភាពរវាងប្រទេសរុស្ស៊ី និងអ៊ុយក្រែន កំពុងប្រឈមមុខគ្នាលើសមរភូមិសង្រ្គាម និងមានការដាក់ទណ្ឌកម្មពីសំណាក់សហរដ្ឋអាមេរិកទៅលើប្រទេសរុស្ស៊ីទៀតនោះ ពេលនេះលេចមុខម្នាក់ឈ្មោះ Dmitry Rogozin ដែលត្រូវបានគេស្គាល់ថាជាប្រធានផ្នែកអវកាសរបស់ប្រទេសរុស្ស៊ី ចេញមកមុខគម្រាមចំៗទៅលើ សហរដ្ឋអាមេរិក បើហ៊ានលូកដៃជៀតជ្រែកចូលរឿងណាមួយរបស់រុស្ស៊ី គឺអាចនឹងទទួលរងពីការទម្លាក់កម្ទេចកម្ទីពីអវកាសចំផ្ទៃដីរបស់អាមេរិកតែម្ដង នេះបើយោងតាមការចុះផ្សាយរបស់គេហទំព័រ futurism។
តាមការបង្ហោះរបស់ Dmitry Rogozin លើ Twitter របស់លោកផ្ទាល់ថា “ប្រសិនបើអ្នក(អាមេរិក) ហ៊ានរារាំងសកម្មភាពណាមួយរបស់យើង(រុស្ស៊ី) តើអ្នកនឹងអាចទប់ទល់កម្ទេចកម្ទីឬសម្រាមអវកាស ដែលធ្លាប់លើទឹកដីសហរដ្ឋអ្នកដែរទេ?
មិនតែប៉ុណ្ណោះលោកក៏បានគម្រាមប្រទេសធំៗពីរទៀតគឺ ចិន និងឥណ្ឌា ថា “យើងក៏មានជម្រើសផ្សេងទៀត ដូចជាការទម្លាក់សម្រាមអវកាសទម្ងន់ ៥០០តោន ឱ្យចំប្រទេសចិននិងឥណ្ឌាដែរ។ ការគំរាមកំហែងបែបនេះ កើតឡើងក្រោយពីលោក Dmitry Rogozin ដឹងទុកជាមុនថា កម្ទេចកម្ទីឬសម្រាមអវកាសនោះ មិនហោះឆ្លងកាត់ប្រទេសរុស្ស៊ីឡើយ ដូច្នេះហើយហានិមភ័យគឺមានតែទៅលើ ប្រទេសដែលលោកបានគំរាមនោះឯង។
លោក Dmitry Rogozin ក៏បានបញ្ជាក់បន្ថែមទៀតថា យើងនៅតែបន្តបង្កើតយានអវកាសបន្ថែមទៀតដោយខ្លួនឯង ហើយយើងកំពុងតែផលិតសមាសធាតុសំខាន់ៗជាច្រើនទៀតនៃយានអវកាសបន្ថែមទៀតដែរ។
គូសបញ្ជាក់ថា ប្រធានាធិបតីអាមេរិកលោក Joe Biden ក៏មិនបានអោបដៃឈរមើលការឈ្លានពានរវាងរុស្ស៊ីទៅលើអ៊ុយក្រែនដែរ ដោយលោកនៅតែបន្តដាក់ទណ្ឌកម្មជាបន្តបន្ទាប់ទៅលើរុស្ស៊ី ដូចជាការឈប់ឱ្យនាំចូលបច្ចេកវិទ្យា ទៅកាន់រុស្ស៊ីទៀតជាដើម។
អត្ថបទដោយ៖ ផែន ផាន់ណា
