បច្ចុប្បន្ននេះបើនិយាយពីសាលាបណ្ដុះបណ្ដាលលើជំនាញសរសេរកូដ ឬបង្រៀនអាយធីផ្ដោតលើមនុស្សស្រីតែមួយមុខ គឺមានតិចណាស់ នៅក្នុងប្រទេសកម្ពុជា។ ជាក់ស្ដែង សម្រាប់ស្ត្រីពេលចប់ថ្នាក់វិទ្យាល័យ ក៏មានចំនួនតិចណាស់ដែរ ដែលហ៊ានឈោងចាប់យកជំនាញអាយធី ដើម្បីបន្តការសិក្សានៅថ្នាក់សាកលវិទ្យាល័យ ខណ:សិស្សប្រុសជាច្រើន ចាប់យកជំនាញនេះ។ មានដើមហេតុជាច្រើនដែលធ្វើឲ្យស្ត្រី មានគម្លាតឆ្ងាយគ្នាជាមួយជំនាញអាយធី ពោលគឺគេតែងតែគិតថាជំនាញនេះសម្រាប់ស្ត្រី ពិបាករៀន, ទាល់តែចេះភាសាអង់គ្លេសខ្លាំង ,ចេះគណិតវិទ្យាខ្លាំង, ឬត្រូវចំណាយពេលវេលាច្រើនទៅលើវាជាដើម។ បញ្ហាមួយទៀត គឺស្ត្រីភាគច្រើនគ្មានគ្រឹះពីថ្នាក់ក្រោមមក លើជំនាញចំណូលខ្ពស់មួយនេះទេ។
ដោយមើលឃើញពីតម្រូវការ និងបញ្ហាមួយចំនួនទៀតរបស់ស្ដ្រី ក្នុងវិស័យព័ត៌មានវិទ្យា ឬអាយធីនេះ ក្លឹប IT Academy STEP Cambodia ក៏បានបង្កើតកន្លែងមួយឈ្មោះ Sisters of code ដែលជាថ្នាលបណ្ដុះបណ្ដាលស្ត្រីលើជំនាញអាយធីតែមុខគត់ និងដំបូងបង្អស់នៅប្រទេសកម្ពុជា។
Sisters of code គឺជាក្លិបសិក្សាអាយធី ដំបូងបំផុតសម្រាប់ក្មេងស្រីកម្ពុជា ដែលមានអាយុចាប់ពី១០ ទៅ២០ឆ្នាំ ឲ្យសិក្សាជំនាញសរសេរកូដ ដោយឥតគិតថ្លៃរយៈពេល ១៨សប្តាហ៍។ អ្វីដែលកាន់តែពិសេសនោះគឺក្លឹបសិក្សាមួយនេះ នឹងមិនយកប្រាក់កម្រៃឡើយ ព្រោះគោលបំណងដែលបង្កើតក្លឹបនេះឡើងមក គឺដើម្បីជួយលើកទឹកចិត្តឲ្យក្មេងស្រីមានឱកាសចាប់យកជំនាញឌីជីថល ពិសេសលើជំនាញ Programing និងពង្រឹងទំនុកចិត្តរបស់ស្ត្រីក្នុងវិស័យអាយធី។
នៅក្នុងកិច្ចសម្ភាសន៍រវាងក្រុមការងា Technology Cambodia ជាមួយអ្នកស្រី Nataly ដែលជានាយកគ្រប់គ្រងរបស់ IT Academy STEP Cambodia អ្នកស្រីបានប្រាប់មកកាន់ ក្រុមងារងារយើងថា “ដោយមើលឃើញថាប្រទេសកម្ពុជា មានសិស្សស្រីដែលសិក្សាជំនាញអាយធី នៅតិចតួច ពោលគឺមានក្មេងស្រីត្រឹមតែ១០%ប៉ុណ្ណោះ។ អាស្រ័យហេតុនេះហើយទើបអ្នកស្រីសម្រេចចិត្ត បង្កើតឲ្យមានកម្មវិធីសិក្សានេះឡើងដើម្បី ជួយឲ្យក្មេងស្រីអាយុចាប់ពី ១០ទៅ២០ឆ្នាំ ទទួលបានចំណេះដឹងខាងផ្នែកបច្ចេកវិទ្យា ឲ្យកាន់តែច្រើន។ បន្ថែមពីនេះទៅទៀត ក៏ដើម្បីជាការជួយឲ្យផ្នែកឌីជីថលនៅកម្ពុជាយើង មានភាពរីកចម្រើនផងដែរ។”
បន្ថែមពីលើនេះ អ្នកស្រីបានបន្តថា អនាគតប្រទេស និងអនាគតពួកយើងគឺនៅក្នុងដៃយើង។ យើងត្រូវចំណាយពេលវេលាដើម្បីទទួលយកចំណេះដឹងថ្មីៗ ទើបយើងអាចក្លាយជាមនុស្សម្នាក់ដែលមានសម្ថភាពខ្លាំងនៅថ្ងៃអនាគត។
គូសបញ្ជាក់ថា Sisters of code ក្រោយការជួយជ្រុំជ្រេងពីសំណាកស្ថាប័នធំៗជាច្រើនដូចជា USAID, ORGENIZEE, Devolopment Inovation, និង STEP IT Acadermy Cambodia នេះជាដើម។ សម្រាប់សិស្សស្ត្រីដែលមានអាយុពី១០ ដល់២០ឆ្នាំ ដែលបានចូលសិក្សាជំនាញអាយធីនៅ Sisters of code នឹងទទួលបានការបណ្តុះបណ្តាលពេញលេញតាមកម្មវិធីសិក្សាអន្តរជាតិ ខណ:ពេលរៀនចប់ សិស្សទាំងអស់នឹងទទួលបានវិញ្ញាបនបត្របញ្ជាក់ការសិក្សា ព្រមទាំងអត្ថប្រយោជន៍ជាច្រើនទៀត។