ស្ថិតក្នុងស្ថានភាពមួយដ៏ក្ដៅគគុក ចាប់តាំងពីរុស្ស៊ីបើកប្រតិបត្តិការពិសេសក្នុងទឹកដីប្រទេសអ៊ុយក្រែន បានធ្វើឱ្យប្រទេសមហាអំណាច ចាប់ផ្ដើមដាក់ទណ្ឌកម្មជាបន្តបន្ទាប់ទៅលើរុស្ស៊ី។ រឿងរ៉ាវពិបាកស្មានដឹងមុន អ៊ុយក្រែនខាតបង់ទាំងធនធានមនុស្ស និងហេដ្ឋារចនាសម្ព័ន្ធ ជាច្រើនក្នុងប្រទេសខ្លួន រីឯសន្ទុះនៃសេដ្ឋកិច្ចរបស់ប្រទេសរុស្ស៊ីវិញ ក៏កំពុងដាំក្បាលចុះខ្លាំង ខណៈបន្ទុកទណ្ឌកម្មកាន់តែធ្ងន់ទៅៗ។
បើយោងតាមរបាយការណ៍មួយ ចុះផ្សាយដោយកាសែត futurism បានឱ្យដឹងថា ប្រធានអវកាសរបស់រុស្ស៊ីលោក Dmitry Rogozin កំពុងដាក់សំណើរសុំទិញគ្រឿងផ្កាយរណបពីប្រទេសចិន ដើម្បីផ្គត់ផ្គងដល់ដំណើរអវកាសរបស់ខ្លួន។ លោកក៏បានបន្ថែមទៀតថា យើង(រុស្ស៊ី) មានទំនាក់ទំនងល្អជាមួយប្រទេសចិន ហើយយើងនឹងទិញគ្រឿងបន្លាស់ និងគ្រឿងមួយចំនួនទៀតដែលរុស្ស៊ីមិនអាចផលិតបាន ពីប្រទេសចិនមក ប៉ុន្តែប្រទេសចិនឆ្លើយតបមកវិញថា ផលិតអត់ទាន់ទេ។
គូសបញ្ជាក់ថាមកទល់ពេលនេះ សេដ្ឋកិច្ច និងរូបិយប័ណ្ណរ៉ុស្ស៊ីកំពុងធ្លាក់ចុះខ្លាំង បណ្ដាលមកពីការដាក់ទណ្ឌកម្មជាហូរហែពីសំណាក់សហរដ្ឋអាមេរិក ហើយសហភាពអ៊ឺរ៉ុបក៏បានកាត់ផ្ដាច់ប្រទេសរុស្ស៊ីចេញពី ប្រព័ន្ធទូទាត់អន្តរធនាគារពិភពលោក SWIFT ទៀតផង។ យ៉ាងណាមិញសង្គ្រាមរុស្ស៊ីនិងអ៊ុយក្រែននេះ បានឈានចូលដល់ថ្លៃទី៦ហើយ ខណៈកាលចរចាស្វែងរកដំណោះស្រាយបានធ្វើឡើងរួចហើយក្ដី។
អត្ថបទដោយ៖ ផែន ផាន់ណា
