នៅថ្ងៃអង្គារនេះ ប្រទេសវៀតណាមកំពុងប្រុងជើងការ ទប់ទល់ជាមួយនឹងគ្រោះធម្មជាតិ ខណៈព្យុះ Noru កំពុងរំកិលខ្លួនជិតដល់ភាគកណ្ដាលនៃប្រទេសនេះ។ ព្យុះ Noru បានចាប់ផ្ដើមបោកបក់ ជាមួយនឹងខ្យល់អតិបរមា ១៨៣ គីឡូម៉ែត្រក្នុងមួយម៉ោង។ នេះបើយោងតាមការចុះផ្សាយរបស់កាសែត e.vnexpress ។
ប្រភពខាងលើក៏បានបញ្ជាក់ដែរថា ល្បឿនខ្យល់អតិបរមា នឹងរក្សាបានក្នុងលឿន ១៨៣ គីឡូម៉ែត្រក្នុងមួយម៉ោង ត្រឹមម៉ោង៧យប់នេះ (យប់ថ្ងៃអង្គារ) ខណៈពេលនេះព្យុះ Noru មានចម្ងាយប្រហែល ១៧០ គីឡូម៉ែត្រពីទីក្រុង Da Nang និងជិតខេត្ត Quang Nam ១២០គីឡូម៉ែត្រ។
សម្រាប់ថ្ងៃស្អែក (ថ្ងៃពុធ) ព្យុះនេះនឹងរំកិលខ្លួនទៅទិសខាងត្បូង ឆ្ពោះទៅលើខេត្ត Quang Tri, Thua Thien Hue, Quang Nam , Quang Ngai, និង Da Nang ដោយមានខ្យល់បក់រហូតដល់ ១៤៩ គីឡូម៉ែត្រក្នុងមួយម៉ោង។ គូសបញ្ជាក់ថា ពេលនេះប្រទេសវៀតណាមកំពុងត្រៀមខ្លួនរួចជាស្រេច ដើម្បីទប់ស្កាត់បញ្ហាផ្សេងៗ ដែលកើតមានឡើង បណ្ដាលមកពីព្យុះ Noru នេះ។
អត្ថបទដោយ៖ ផែន ផាន់ណា
