ថ្មីៗនេះបេឡាជាតិបានចេញសេចក្ដីជូនដំណឹង  ស្តីពីការប្រឡងជ្រើសរើសបុគ្គលិកជាប់កិច្ចសន្យា ឱ្យចូលបម្រើការងារ នៅបេឡាជាតិសន្តិសុខសង្គម សម្រាប់ឆ្នាំ២០២៣។ បេឡាជាតិសន្តិសុខសង្គម ហៅកាត់ ប.ស.ស. គឺជាគ្រឹះស្ថានសាធារណៈរដ្ឋបាល ដែលមានភារកិច្ច គ្រប់គ្រង និងចាត់ចែងផ្នែកទាំងអស់នៃរបបសន្តិសុខសង្គម។ គ្រឹះស្ថាន ត្រូវការជ្រើសរើសបុគ្គលិកជាប់កិច្ចសន្យា សរុបចំនួន ២៩១នាក់ ឱ្យបម្រើការងារនៅស្នាក់ការកណ្តាលចំនួន ១៩៣នាក់ សាខា ប.ស.ស. ខណ្ឌចំនួន ២០នាក់ និងបណ្តាសាខា ប.ស.ស. ខេត្តចំនួន ៧៨នាក់។ បេក្ខជន-បេក្ខនារី ត្រូវមានអាយុចាប់ពី១៨ឆ្នាំ រហូតដល់៤០ឆ្នាំ គិត ត្រឹមថ្ងៃឈប់ទទួលពាក្យ និងពុំមានឈ្មោះបម្រើការងារក្នុងក្របខ័ណ្ឌរដ្ឋ (ជនពិការត្រូវបានលើកទឹកចិត្ត)។