អ្នកលក់ទំនិញនៅលើអនឡាញមួយចំនួន ប្រហែលជាបានស្គាល់មុខងារ Marketplace របស់ Facebook ហើយ ប៉ុន្តែក៏នៅមានអ្នកលក់ជើងថ្មីមួយចំនួនទៀត ហាក់មិនទាន់បានស្គាល់នៅឡើយ។ នៅលើ Facebook ដែលយើងអង្គុយអូសចុះអូសឡើងពេញៗមួយថ្ងៃនេះ មានមុខងារមួយឈ្មោះ Marketplace ដែលយើងអាចដាក់លក់ទំនិញនៅលើមុខងារនេះបានដោយសេរី និងមិនគិតកម្រៃអ្វីឡើយ។ ដើម្បីឱ្យបងប្អូនយល់ដឹងកាន់តែច្បាស់អំពីមុខងារ ក្រុមការងារ Technology Cambodia (ចាបខៀវ) នឹងណែនាំពីរបៀបផុសលក់ផលិតផលនៅលើមុខងារនេះ ម្ដងមួយជំហានៗ ដែលយើងអាចអនុវត្តបាន នឹងផុសលក់ភ្លាមៗ៖
១. ចូលទៅកាន់សញ្ញាត្រេ៣នៅលើ Facebook រួចចុចនៅលើមុងងារ Marketplace (ដូចបង្ហាញក្នុងរូប)
២. ចុចលើពាក្យ Sell ដើម្បីដាក់លក់ផលិតផល បន្ទាប់ជ្រើសរើសពាក្យថា Items
៣. បន្ទាប់មកសូមធ្វើការជ្រើសរើសរូបភាពផលិតផល បញ្ជាក់ឈ្មោះផលិតផល បញ្ចូលតម្លៃ ជ្រើសរើសប្រភេទនៃផលិតផល លក្ខខណ្ឌ និងពិពណ៌នាអំពីផលិតផលឱ្យអតិថិជនបានយល់កាន់តែច្បាស់ រួចជ្រើសរើសពាក្យថា Publish ជាការស្រេច៕
