បើតាមលោកបណ្ឌិត ឃឹម ចំរើន ដែលជាអ្នកគ្រប់គ្រងទូទៅ ក្នុងមជ្ឈមណ្ឌលផលិតកម្មឌីជីថលនេះ បានប្រាប់ក្រុមការងារ Technology Cambodia ថា នេះគឺជាមជ្ឈមណ្ឌល ដែលជាជំនួយរបស់ប្រទេសជប៉ុន ដោយបង្កើតឡើងនៅក្នុងគោលបំណងបណ្ដុះនូវធនធានមនុស្ស ពិសេសលើផ្នែកផលិតកម្មឌីជីថល និងផ្នែកពាក់ព័ន្ធផ្សេងៗទៀត ដើម្បីធ្វើយ៉ាងណាជួយជម្រុញកម្ពុជាឱ្យទាន់ឧស្សាហកម្ម ៤.០ នៅពេលអនាគត។  លោកបានបន្តថា ក្នុងចំណោមម៉ាស៊ីនទាំង៣ខាងលើ គឺមានម៉ាស៊ីនមួយដែលជាបច្ចេកវិទ្យារបស់ប្រទេសអាល្លឺម៉ង់ និងជប៉ុន ដែលបានផ្ដល់ជូនមកកម្ពុជាយើង ដោយម៉ាស៊ីនព្រីនដែកប្រភេទនេះមានត្រឹមតែ ២ទៅ៣គ្រឿងប៉ុណ្ណោះលើលោក (ព្រោះទើបនឹងរកឃើញ)។

LASERTEC 300 EDE Hybrid ឬម៉ាស៊ីនព្រីនដែកនេះ គឺមានសមត្ថភាពខ្ពស់ និងត្រូវការវត្ថុធាតុដើមត្រឹមត្រូវ ទើបអាចព្រីនដែក និងរបស់អ្វីម្យ៉ាងដែលនិស្សិត ឬអ្នកច្នៃប្រឌិត ធ្លាប់តែស្រមើស្រមៃក្នុងខួរក្បាល ឱ្យចេញជារូបភាពមកបាន។ ​លោកបណ្ឌិតឃឹម ចំរើន បានបញ្ជាក់ថា នេះគឺជាម៉ាស៊ីនដែលមានលក្ខណ:ទំនើប ដែលគេប្រើវាក្នុងការព្រីនដែកឱ្យចេញជាវត្ថុផ្សេងៗតាមការចង់បាន ហើយនៅកម្ពុជាយើងទើបតែមានមួយគ្រឿងនេះប៉ុណ្ណោះ។ ម៉ាស៊ីនព្រីនដែកដ៏ទំនើបនេះ នឹងចូលខ្លួនមកបណ្ដុះធនធានមនុស្សនៅកម្ពុជា ពិសេសគឺនិស្សិតដែលមានបំណងចង់សិស្សលើជំនាញមេកានិច និងអ្នកស្រឡាញ់ការច្នៃប្រឌិតផ្សេងៗ។ ទស្សនាវីដេអូខាងក្រោម៖

គូសបញ្ជាក់ថា មជ្ឈមណ្ឌលផលិតកម្មឌីជីថលកម្ពុជា-ជប៉ុន បានដាក់ឱ្យដំណើរការកាលពីថ្ងៃទី ២៣ ខែឧសភា ឆ្នាំ២០២៣ និងគ្រោងរៀបចំឱ្យមានថ្នាក់បណ្ដុះបណ្ដាលធនធានមនុស្ស លើជំនាញពាក់ព័ន្ធផ្សេងៗផងដែរ៕

អត្ថបទដោយ៖​ ផែន ផាន់ណា