ថ្មីៗនេះរដ្ឋមន្ត្រីក្រសួងសាធារណៈការ និងដឹកជញ្ជូនបានឱ្យដឹងថា “ក្រសួងកំពុងរៀបចំភ្ជាប់ប្រព័ន្ធអិនធឺណិតភ្ជាប់ជាមួយកាមេរ៉ាសុវត្ថិភាពនៅលើផ្លូវជាតិលេខ៣ដើម្បីចាប់ អ្នកបើកបរមិនគោរពច្បាប់ចរាចរណ៍នៅលើដងផ្លូវ ហើយផាកពិន័យដល់ផ្ទះតែម្តង។” នេះបើតាមប្រសាសន៍របស់ឯកឧត្ដម ទេសរដ្ឋមន្រ្ដី ស៊ុន ចាន់ថុល ក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆមាសទី១ និងលើកទិសដៅការងារឆមាសទី២ ឆ្នាំ២០២២ នាព្រឹកថ្ងៃទី១៨ ខែសីហា ឆ្នាំ២០២២ នៅទីស្តីការក្រសួងសាធារណការ និងដឹកជញ្ជូន ចេញផ្សាយដោយក្រសួងព័ត៌មាន។
ប្រភពដដែលបានឱ្យដឹងថា ក្រសួងនឹងបើកការសាងសង់ផ្លូវលេខ៣១, លេខ៣៣ និងផ្លូវលេខ៤១ ហើយក៏បានចរចាដាក់កាមេរ៉ានៅលើផ្លូវទាំងបីនេះផងដែរ។ ជាមួយគ្នានេះឯកឧត្ដម ទេសរដ្ឋមន្រ្ដី ស៊ុន ចាន់ថុល បានលើកឡើងថា នៅផ្លូវជាតិលេខ៣ បានបំពាក់កាមេរ៉ា ចាប់ល្បឿន ប៉ុន្តែមិនទាន់បានអនុវត្តន៍ពេញលេញនៅឡើយ ដោយសារការតភ្ជាប់ប្រព័ន្ធអិនធឺណិតមានការយឹតយ៉ាវបន្តិច ហើយខាងសមត្ថកិច្ចបានកំពុងខិតខំប្រឹងប្រែង សហការជាមួយក្រសួងប្រៃសណីយ៍ និងទូរគមនាគមន៍ដើម្បីតភ្ជាប់ប្រព័ន្ធអិនធឺណិត ជាមួយកាមេរ៉ាចាប់ ខណៈពេលចាប់បានហើយ គឺចេញវិក្កយបត្រទៅដល់ផ្ទះតែម្តង។
ឯកឧត្ដមក៏បានបញ្ជាក់ច្បាស់ដែរថា៖ កាមេរ៉ាផ្លូវជាតិលេខ៣ថតច្បាស់ណាស់ ថតបានទាំងអស់ អីចឹងយើងត្រៀមដូចគ្នានៅផ្លូវជាតិលេខ៣១, ៣៣ និងផ្លូវលេខ៤១ ហើយយើងកំពុងពិភាក្សាជាមួយជប៉ុន ដាក់កាមេរ៉ាដែរ នៅផ្លូវជាតិលេខ៧។
