វិទ្យាស្ថានបច្ចេកវិទ្យាកម្ពុជា ឬសាលាតិចណូ គឺជាកន្លែងមួយដែលសិស្សជាច្រើន ពេលចប់បាក់ឌុប ប្រាថ្នាចង់រៀន។ បច្ចុប្បន្នសាលានេះ មានទីតាំងធំ ស្ថិតនៅកណ្ដាលរាជធានីភ្នំពេញ តាមបណ្ដោយផ្លូវសហព័ន្ធរុស្ស៊ី ជាប់នឹងស្ពានអាកាស៥មករា។ តើទីតាំងរបស់សាលាតិចណូ មាន១ទីតាំងនេះឬ?
មិនមែនមានតែទីតាំងមួយនេះទេ បច្ចុប្បន្នទីតាំងថ្មីរបស់សាលាតិចណូជិតលេចចេញជារូបរាងហើយ ដោយអគារថ្មី និងប្រណិតនេះ គឺស្ថិតនៅក្បែរវិមានឈ្នះឈ្នះ។ ក្រៅពីនៅក្នុងទឹកដីរាជធានីភ្នំពេញ បើតាមការបញ្ជាក់នៅលើផេកផ្លូវការរបស់សាលាតិចណូ ក៏បានឱ្យដឹងផងដែរថា វិទ្យាស្ថានបច្ចេកវិទ្យាកម្ពុជាមាន២ទីតាំងទៀតនៅតាមខេត្ត។
ក្រៅពីនៅតាមបណ្ដោយផ្លូវសហព័ន្ធរុស្ស៊ី និងក្បែរវិមានឈ្នះឈ្នះ សាលាតិចណូគឺមានទីតាំងនៅក្នុងក្រុងកំពង់ចាម និងខេត្តត្បូងឃ្មុំផងដែរ ពោលគឺសរុបទាំងអស់មានរហូតដល់៤ទីតាំង។ ដូច្នេះសម្រាប់សិស្សានុសិស្ស ដែលមានបំណងចង់រៀននៅសាលាតិចណូ អាចរៀននៅសាខាណាមួយ ដែលនៅជិតលោកអ្នកបាន៕
អត្ថបទដោយ៖ ផែន ផាន់ណា
