ថ្មីៗនេះនៅប្រទេសកូរ៉េមានរឿងដ៏គួរឱ្យភ្ញាក់ផ្អើលបានកើតឡើង ដោយយូធូបផ្លូវការរបស់រដ្ឋាភិបាលប្រទេសកូរ៉េខាងត្បូង ត្រូវបានក្រុម Hacker ហែលចូល រួចបង្ហោះវីដេអូឃ្លីបទាក់ទងនឹង លុយគ្រីបតូ ខណៈក្នុងវីដេអូនោះក៏មានរឿងរ៉ាវមហាសេដ្ឋីពិភពលោក Elon Musk និយាយពីលុយគ្រីបតូនេះដែរ។
រឿងរ៉ាវនេះបានកើតឡើងកាលពីថ្ងៃសៅរ៍ទី៣ ខែកញ្ញា កន្លងទៅ ដោយបណ្ដាញយូធូបផ្លូវការ រដ្ឋាភិបាលកូរ៉េខាងត្បូង បានក្លាយជាគោលដៅវាយប្រហារ។ នៅពេលហែកចូលបានភ្លាមៗ ក្រុម Hacker បានព្យាយាមប្ដូរឈ្មោះឆានែលទៅជា SpaceX Invest រួចបង្ហោះឃ្លីប Elon ធ្វើបទសម្ភាសន៍និយាយអំពីលុយគ្រីតូ។ នេះបើយោងតាមការចុះផ្សាយរបស់ News.bitcoin។
ប្រភពដដែលបានឱ្យដឹងបន្ថែមថា មានការសង្ស័យថា Hacker បានលួចយកលេខកូដឆានែលនេះ ដោយភ្លាមៗនោះខាងក្រុមហ៊ុន YouTube ក៏បានជូនដំណឹងផងដែរថា ឆានែលនេះត្រូវបានគេហែកចូលហើយ។ ជាសំណាងល្អដែរឆានែលយូធូបដែលត្រូវបានហែកចូលនេះ ត្រូវបានក្រុមអ្នកជំនាញទាញមកវិញបានដោយសុវត្ថិភាព។
អត្ថបទដោយ៖ ផែន ផាន់ណា
