ជាទូទៅបើយើងនិយាយដល់ ឡានអគ្គិសនី ឬក៏ឡានចំហេះក្នុង នៅពេលដែលជិះចូលទឹកម្តងៗ គឺជៀសមិនផុតឡើយពីការតេហៅឡានស្ទួចនោះទេ ក៏ប៉ុន្តែរថយន្តអគ្គិសនីខ្នាតតូច Fomm One របស់ជប៉ុនមួយនេះ មិនចេះខ្លាចទឹកនោះទេ ថែមទាំងអាចបើកលើទឹកបានទៀតផង ។
ទាំងនេះរឿងមួយដែលប្លែកសម្រាប់ទាំងអស់គ្នា សូម្បីតែ Admin ក៏នឹកស្មានមិនដល់ថា មានឡានអគ្គិសនីចូលចិត្តទឹកបែបនេះឡើយ ហើយអ្នកទាំងអស់គ្នាប្រាកដជាឆ្ងល់ ថារថយន្តមួយនេះបើកបរលើទឹកបានយ៉ាងម៉េចបាន? មិនខ្លាចចូលទឹក ឆ្លងចរន្តឆក់ទេអី ? តោះថ្ងៃនេះ Technology Cambodia នឹងមកដោះស្រាយចម្ងល់ បំភ្លឺការពិត ឲ្យអ្នកទាំងអស់គ្នាបានដឹងទៅចុះ ។
ឡានតូចច្រលឹងកៅអី ៤ Fomm one នេះត្រូវបានបង្កើតឡើងដោយក្រុមហ៊ុន Fomm Corp. នៅក្នុងប្រទេសជប៉ុន ដែលត្រូវបានចាប់ផ្តើមខ្សែសង្វាក់ផលិតនៅខែមីនា ឆ្នាំ ២០១៩ ហើយក៏បានធ្វើដំណើរបន្ទាប់ទៅលក់នៅប្រទេសថៃ ព្រោងព្រាត់ ដែលកាលនោះ មានតម្លៃក្នុង ១គ្រឿងខ្ទង់ ៥៩៩,៩០០ បាត ឬ ជាង ១៧៤០០ ក៏បន្តែ គេមិនទាន់ដាក់បច្ចេកវិទ្យាដែលអាចបើកលើទឹកបានទេ ។
ទន្ទឹមនឹងនេះផងដែរ បើយោងតាមការចេញផ្សាយរបស់គេហទំព័រ Paultan បានឲ្យដឹងថា រថយន្តអគ្គិសនី Fomm One ត្រូវបានគេតេស្តសាកល្បងសមត្ថភាពទៅលើផ្នែកថាមពលអាគុយដែលជាប្រភេទលីចូមអ៊ីយ៉ុង 12 KWh របស់ជប៉ុន គេសង្កេតឃើញថាឡាននេះអាចរត់ចម្ងាយបានដល់ 160 Km ។ រីឯការសាកថ្មវិញ ខាងក្រុមហ៊ុន Fomm Corp បានបញ្ជាក់ថា សម្រាប់ការខ្សែសាកប្រភេទធម្មតា ( AC Type 2) យើងត្រូវចំណាយពេល ៦ ម៉ោង ប៉ុន្តែសម្រាប់ខ្សែសាកល្បឿនលឿន DC Fast Charge ខាងក្រុមហ៊ុនមិនទាន់បញ្ជាក់នៅឡើយទេ ។
ម្យ៉ាងវិញទៀត សម្រាប់រថយន្តខ្នាតតូច Fomm One មួយនេះ ខាងក្រុមហ៊ុនជប៉ុនបានបំពាក់ ឈ្នាន់ហ្វ្រាំងតែមួយគត់ ពោលគឺគ្មានឈ្នាន់សម្រាប់ជាន់ល្បឿននោះទេ ផ្ទុយមកវិញគេលើកទឹកចិត្តឲ្យម្ចាស់រថយន្តបានភ្លក្សនូវរសជាតិ ចង្កូតឡានស្ព័រវិញម្តង ដែលអាចឲ្យយើងបន្ថែមបន្ថយល្បឿនបានតាមរយ:ដៃចង្កូត (Paddle shift) ។
ចំណែកឯ សម្រាប់សំណួរខាងលើនេះ ខាងក្រុមហ៊ុន Fomm Corp. ក៏បានលើកហេតុផលមកថា « មូលហេតុដែល Fomm One អាចអណ្តែតលើទឹកបាន គឺដោយសារតួខ្លួនរបស់ឡាននេះត្រូវបានរំព័ន្ធដោយជ័រ ទើបធ្វើឲ្យវាមានទម្ងន់ស្រាលតែ 630kg ទេ ម្យ៉ាងវិញទៀតយ៉ាន់កង់គេបាន ច្នៃឲ្យដូចទៅនឹងស្លាបចាក់កានូតអ៊ីចឹង ដើម្បីឲ្យឡានអាចចល័តខ្លួនទៅមុខបាន ។
គូសបញ្ជាក់ផងដែរថា រថយន្តអគ្គិសនី Fomm One ត្រូវបានលក់ចេញនៅប្រទេសជប៉ុនបានចំនួន ២០ គ្រឿនរួចមកហើយកាលពីឆ្នាំ ២០២១ ហើយក្រុមហ៊ុន Fomm Corp ក៏មានគម្រោងផលិត បន្ថែមទៀតចំនួន ១០០០០ គ្រឿន នាពេលឆាប់ៗនេះ ។
ជាចុងក្រោយ តើអ្នកទាំងអស់យល់យ៉ាងម៉េចដែរ សម្រាប់ឡានអគ្គិសនីបើកលើទឹកមួយនេះ ។ អាចខមិនប្រាប់ Admin បន្តិចមក ប្រសិនឡាននេះមកដល់ខ្មែរ គួរទិញជិះដែរឬទេ? បើទិញ គួរតែយកឡាននេះទៅជិះនៅណា ឬ ក៏យកទៅធ្វើអ្វីផ្សេង ?
អត្ថបទដោយ៖ ព្រឹម ភក្ដី (Fb : Pheakdey Prem , Telegram : 0102720222 )
