ប្រិយមិត្តប្រាកដជាបានដឹងមកហើយថាបច្ចុប្បន្ននេះទូរស័ព្ទ iPhone កំពុងប្រើប្រាស់នូវរន្ធសាកថ្មប្រភេទ USB-Lightning ប៉ុន្តែសម្រាប់ឧបករណ៍មួយចំនួនរបស់ Apple ក៏ប្រើ USB-C ដែរ។ ដោយឡែកសហភាពអឺរ៉ុបក៏បានចេញច្បាប់មួយថានឹងដាក់រន្ធសាក USB-C លើឧបករណ៍ប្រើប្រាស់ជាច្រើន។
ដោយយោងទៅតាមសេចក្តីប្រកាសរបស់សភាអឺរ៉ុប European Parliament បានបង្ហាញថា ច្បាប់ថ្មីនេះនឹងធ្វើឱ្យអ្នកទិញក៏ដូចជាអ្នកប្រើប្រាស់ទាំងអស់ពុំចាំបាច់ទិញខ្សែសាកថ្មថ្មីនោះទេរាល់ពេលដែលចង់ប្តូរឬទិញទូរស័ព្ទថ្មីពោលគឺ ប្រើតែខ្សែសាកថ្មមួយគឺត្រូវជាមួយនឹងឧបករណ៍សឹងទាំងអស់។
ប្រភពដដែលក៏បានបន្តថា ដើម្បីដោះស្រាយបញ្ហានេះបានគឺរាល់ឧបករណ៍ប្រើប្រាស់ជាច្រើនដូចជា៖ ទូរស័ព្ទ កាសតូច កាសធំ ដៃបញ្ជាលេងហ្គេម Speaker ជាដើមគឺត្រូវតែបំពាក់រន្ធសាកថ្ម USB-C មកជាមួយ។
យ៉ាងណាមិញ គណៈកម្មការនៃសហភាពអឺរ៉ុបគឺចង់ជំរុញឱ្យមានស្តង់ដារថ្មីទៅលើការសាកថ្មដោយមិនប្រើខ្សែ ជាក់ស្តែងដូចជា Apple MagSafe ជាដើម ហើយការធ្វើបែបនេះគឺដើម្បីកាត់បន្ថយកាកសំណល់ដែលចេញមកពីផលិតផលអេឡិចត្រូនិច។
គួររំលឹកផងដែរថា កាកសំណល់ឆ្នាំងសាកឧបករណ៍អេឡិចត្រូនិចប្រហែលកន្លះពាន់លានបានដឹកទៅកាន់សហភាពអឺរ៉ុបជារៀងរាល់ឆ្នាំ មិនតែប៉ុណ្ណោះវាបង្កើតទៅជាកាកសំណល់ចំនួន 11,000 ទៅ 13,000 តោន នៃឆ្នាំងសាកថ្មទូរស័ព្ទរួមជាមួយនឹងផលិតផលតូចៗផ្សេងទៀត។
អត្ថបទដោយ៖ រិន មករា