គណនី Twitter របស់អតីតប្រធានាធិបតីអាមេរិក គឺលោកដូណលត្រាំ ត្រូវបាន Twitter បិទលែងឱ្យប្រើដោយសារកត្តានយោបាយ អំឡុងពេលលោកធ្វើជាប្រធានាធិបតី។ បន្ទាប់ពីលោក Elon Musk ដែលជាមនុស្សគាំទ្រលោកត្រាំតាំងពីដើមរៀងមក បានទិញយក Twitter ក្នុងតម្លៃ៤៤ពាន់លានដុល្លារកាលពីខែតុលាកន្លងទៅរួចមក ពេលនេះ ឥឡូវនេះគណនី Twitter របស់លោកត្រាំ ត្រូវស្រោចស្រង់យកមកវិញហើយ។

ប្រភពដដែលបានឱ្យដឹងថា មុននឹងសម្រាប់ដាក់ឱ្យប្រើឡើងវិញនេះ លោក Elon Musk មិនបានសម្រេចចិត្តតែឯងទេ ពោលគឺលោកបានបង្ហោះសារស្ទង់មតិរបស់អ្នកគាំទ្រ ខណៈលទ្ធផលបានបញ្ជាក់កាលពីយប់ថ្ងៃសៅរ៍កន្លងទៅ បង្ហាញថា ៥១.៨% ពេញចិត្ត និង៤៨.២ជំទាស់ មិនចង់ឱ្យគណនីរបស់ត្រាំបានមកវិញទេ។

គូសបញ្ជាក់ថាលោកត្រាំ ធ្លាប់បាននិយាយថា លោកនឹងបន្តលេងបណ្ដាញសង្គមដែលលោកបានបង្កើតឡើងឈ្មោះ Truth Social ជំនួសឱ្យការប្រើ Twitter ប៉ុន្តែត្រូវបានគេមើលឃើញថា ប្រសិនបើលោកប្ដូរចិត្ត រួចត្រឡប់មកប្រើគណនី Twitter ចាស់របស់លោកវិញ លោកជីវភាពនយោបាយរបស់លោកនឹងកាន់តែល្អប្រសើរ ខណៈថ្មីៗនេះលោកបានប្រកាសនឹងចេញឡើងឈរឈ្មោះធ្វើជាប្រធានាធិបតីអាមេរិកម្ដងទៀត នៅឆ្នាំ២០២៤ខាងមុខនេះ៕

អត្ថបទដោយ៖​ ផែន ផាន់ណា