ជារឿងគួរឱ្យរំភើបទៅលើបុរសម្នាក់ដែលស្ម័គ្រចិត្តក្នុងការបំពាក់ឈីបរបស់ក្រុមហ៊ុន Neuralink របស់ Elon Musk ចូលទៅក្នុងខួរក្បាលរបស់ខ្លួន ហើយបានកែប្រែពីមនុស្សកម្រើកមិនបានសោះ អាចបញ្ជារកុំព្យូទ័រលេងហ្គេមដោយប្រើប្រាស់ការគិតបញ្ជូនទៅឈីប។
លោក Noland Arbaugh ជាជនរងគ្រោះដោយគ្រោះថ្នាក់ចរាចរមួយរូបធ្វើឱ្យលោកមិនអាចកម្រើកអវយវៈបាន បានស្ម័គ្រចិត្តធ្វើជាក្រុមមនុស្សដំបូងទទួលយកការបំពាក់ឈីបក្នុងខួរក្បាលពីសំណាក់ក្រុមហ៊ុន Neuralink កាលពីខែមករាមកម្លេះ ក្រោយក្រុមហ៊ុននេះទទួលបានការអនុញ្ញាតពីរដ្ឋអាមេរិក ឱ្យធ្វើការតេស្ដសាកល្បងលើមនុស្សផ្ទាល់ បន្ទាប់ពីការតេស្ដសាកល្បងដោយជោគជ័យលើសត្វ។
ក្រោយបំពាក់បាន២ខែជាង លោក Noland បានបង្ហោះពីសកម្មភាពរបស់លោកលើផ្លេតហ្វមបណ្ដាញសង្គមរបស់ Elon Musk ដែលគេស្គាល់ថា X នោះ អំពីក្ដីរំភើបរបស់គាត់ក្នុងការអាចបញ្ជារ Mouse កុំព្យូទ័រលេងហ្គេមដោយប្រើប្រាស់ត្រឹមតែការគិតតែប៉ុណ្ណោះ។
លោកសប្បាយចិត្តខ្លាំងមែនទែនដោយបាននិយាយថា៖ “អ្នកបានឱ្យសមត្ថភាពក្នុងការលេងហ្គេមម្ដងទៀត ហើយលេង ៨ម៉ោងជាប់គ្នា”។
តាមអ្វីដែលលោក Noland បញ្ជាក់ ថាការវះកាត់ក្នុងការដាក់ឈីបនោះសម្រាប់លោកមានភាពងាយស្រួលមែនទែន ដោយក្រោយពេលវះកាត់ដាក់ត្រឹមតែមួយថ្ងៃប៉ុណ្ណោះលោកអាចចេញពីពេទ្យបាន។
ពិតណាស់ថាបច្ចេកវិទ្យាថ្មី ស្ថិតក្នុងដំណាក់កាលតេស្ដសាកល្បងនិងអភិវឌ្ឍមិនទាន់ដើររលូន ១០០% នោះទេ ដោយលោក បានលើកឡើងថា “វាមិនទាន់ឥតខ្ចោះទេ ពេលខ្លះក៏មានកំហុសខ្លះដែរ” ហើយលោកបានបន្ថែមទៀតថា “បច្ចុប្បន្នស្ថិតនៅកម្រិតដំបូងនៅឡើយ”។
យ៉ាងណាសម្រាប់មហាជន ហើយមួយចំនួនអាចជាអ្នកនិយមគាំទ្រ Elon Musk ផងនោះ បានសម្ដែងអារម្មណ៍សាទរយ៉ាងខ្លាំងនៅលើបណ្ដាញសង្គម X៕
