គណៈកម្មការការពារទិន្នន័យរបស់អៀរឡង់ បានឱ្យដឹងផងដែរថា ក្រុមហ៊ុន Meta នឹងត្រូវបង់ប្រាក់ សម្រាប់ការផាកពិន័យចំនួន២ករណី ដោយទី១គឺពិន័យជាទឹកប្រាក់ ២២២.៥លានដុល្លារ ចំពោះការរំលោភរបស់ Facebook លើច្បាប់ការពារទិន្នន័យរបស់សហភាពអ៊ឺរ៉ុប ឬ GDPR និងទីពីរ គឺពិន័យទឹកប្រាក់ចំនួន ១៩២លានដុល្លារ លើការល្មើសច្បាប់ដូចគ្នារបស់ Instagram។

ជាមួយគ្នានេះដែរ ក្រុមហ៊ុន Meta ខ្លួនក៏គ្រោងនឹងប្ដឹងតបវិញចំពោះសេចក្ដីសម្រេចនេះដែរ ព្រោះការសម្រេចបែបនេះ​ ហាក់មិនសមស្របទាល់តែសោះ។ អ្នកនាំពាក្យរបស់ Meta ក៏បានបញ្ជាក់ផងដែរថា មានការយល់ច្រឡំ ជាមួយនឹងការសន្និដ្ឋានមិនត្រឹមត្រូវរបស់និយ័តករ ចំពោះការផាកពិន័យខាងលើនេះ ដូច្នេះគឺទាមទារឱ្យមានការជជែកវែកញែកគ្នាសិន ដើម្បីកំណត់ច្បាប់សមស្របណាមួយ លើបញ្ហាដែលបានកើតឡើងនេះ។

គូសបញ្ជាក់ថា ក្រុមហ៊ុន Facebook កំពុងតែជួបប្រទះជាមួយបញ្ហាច្រើន រាប់ចាប់តាំងពីឆ្នាំ២០២២ កន្លងមក ទាំងការប្ដឹងផ្ដល់គ្នា វិបត្តិហិរញ្ញវត្ថុក្នុងក្រុមហ៊ុន រហូតឈានដល់ការកាត់បន្ថយបុគ្គលិកចេញរាប់ម៉ឹននាក់។ ឥឡូវកើតឆាកឆ្នាំថ្មីទើបតែបាន៤ថ្ងៃ ហ្វេសប៊ុកត្រូវបានគេនិយ័តសហភាពអ៊ឺរ៉ុបពិន័យជាង ៤០០លានដុល្លារទៀត៕

អត្ថបទដោយ៖ ផែន ផាន់ណា