ក្រុមហ៊ុន Samsung នឹងចាប់ផ្ដើមផលិតគ្រឿងបន្លាស់បន្ទះឈីប (semiconductor) នៅប្រទេសវៀតណាម ក្នុងខែកក្កដា ឆ្នាំ២០២៣ ខាងមុខនេះ ខណៈក្រុមហ៊ុនដែលមានបទពិសោធន៍ចាស់វស្សាលើការផលិតបន្ទះឈីបមួយនេះ ចាប់ផ្ដើមពង្រីកវិសាលភាពរោងចក្ររបស់ខ្លួន កាន់តែច្រើនឡើងៗ។
បើយោងតាមការចុះផ្សយរបស់កាសែត Nikkei Asia បានឱ្យដឹងថា ក្រុមហ៊ុនផលិតឈីប របស់ប្រទេសកូរ៉េខាងត្បូងមួយនេះ កំពុងសាកល្បងផលិតគ្រាប់ grid array ដែលជាធាតុផ្សំមួយនៅក្នុងឈីប និងមានបំណងធ្វើវាឱ្យច្រើន នៅឯរោងចក្រ Samsung Electro-Mechanics Vietnam ភាគខាងជើងខេត្ត Thai Nguyen នៃប្រទេសវៀតណាម។
បច្ចុប្បន្ននេះប្រទេសវៀតណាម កំពុងទទួលបានការចាប់អារម្មណ៍ច្រើន ពីសំណាក់ក្រុមហ៊ុនធំៗនៅលើលោក ខណៈក្រុមហ៊ុនផលិតគ្រឿងអេឡិចត្រូនិក និងធ្វើបន្ទះឈីប Intel និង Samsung បានបោះទីតាំងរោងចក្ររបស់ខ្លួន ក្នុងប្រទេសនេះរួចទៅហើយ។ ជាមួយគ្នានេះ ក្រុមហ៊ុន Samsung ក៏គ្រោងនឹងបើករោងចក្រផលិតបន្ទះឈីបមានតម្លៃ ១៧ពាន់លានដុល្លារនៅក្នុងរដ្ឋតិចសាស់ផងដែរ។
អត្ថបទដោយ៖ ផែន ផាន់ណា
