ជាទូទៅបើនិយាយអំពីឡានប្រភេទ Supercar ឬប្រភេទស្ព័រវិញ គឺចាប់អារម្មណ៍ខ្លាំងជាងគេនោះរូបរាង តម្លៃ និងល្បឿនល្បឿនដែលភ្ជាប់មកជាមួយនឹងសំឡេងស៊ីមាំងយ៉ាងស្រួយ របស់កម្លាំងម៉ាស៊ីនរថយន្ត ប៉ុន្តែប្លែកអី BMW i8 មួយនេះ ម៉ាស៊ីនតូចតែកម្លាំងខ្លាំងគ្រាន់បើ ហើយកម្រិតស៊ីសាំងទៀតសោត គឺចំណាយតិចជាង Toyota Prius ទៅទៀត ចំពោះចម្ងាយ 100km ដំបូងដូចគ្នា ។
BMW i8 ត្រូវបានផលិតនិងលក់ចេញក្នុងអំឡុងឆ្នាំ២០១៤ ទៅ ឆ្នាំ២០១៥ ហើយរថយន្តនេះផងដែរ គឺប្រើជាម៉ាស៊ីនសាំងអមជាមួយនឹងម៉ូទ័រអគ្គិសនី ដែលភាសាបច្ចេកទេសនោះគេហៅថា Plug-in Hybrid ។
រីឯគំរូនៃការឌីហ្សាញបែបស្ព័រមួយនេះ ខាងក្រុមហ៊ុនបានចម្លងស្ទីលន៍តាម BMW i3 ដោយបានយកគំរូផ្នែកខាងមុខ និងបន្ថែមនូវ liquid-cooled lithium-ion (សម្រាប់ស្អំទប់ស្កាត់កម្តៅរបស់ម៉ាស៊ីន ) ។ មិនតែប៉ុណ្ណោះ ចំពោះផ្នែកខាងក្រោយនេះវិញ ត្រូវបានគេឌីហ្សាញជា Arrow Dynamic សម្រាប់ឲ្យខ្យល់រត់ចូលតាមចន្លោះៗ ហើយក៏ចេញតាមប្រលោះពីរនៅទាំងសងខាងផ្នែកខាងក្រោយ ព្រមទាំងជួយទប់លំនឹងនៅពេលបើកបរលឿន ហើយការរចនាបែបនេះ គឺមានបំណងចង់ឲ្យម្ចាស់នៃ i8 អាចជាន់ល្បឿនបានតាមចិត្ត ដោយគ្មានភាពស្ទាក់ស្ទើរឡើយ។
សម្រាប់ រថយន្តនេះគឺដំណើរការដោយប៊ុង ២ ប្រើប្រអប់លេខ ៦វគ្គអូតូ ថែមទាំងមាននូវរបៀបបើកបរជា ៣ ជម្រើស E- Drive និង Sport ប៉ុន្តែគេបានបន្ថែមមកជាមួយនឹង Eco pro ជារបៀបបើកបរដែលជួយសន្សំសំចៃខ្ពស់ដោយ 100 km ស៊ីសាំងមិនដល់ ៥ លីត្រនោះទេ ។
ក្រឡេកមកនិយាយពីកម្លាំងម៉ាស៊ីនរបស់រថយន្តដែលជាប្រភេទ plug-in Hybrid មួយនេះវិញ គឺគេបានបំពាក់មកជាមួយស៊ីឡាំង ៣ (i-3) ចំណុះ 1.5L កម្លាំងរួមគ្នារវាងម៉ាស៊ីនសាំងនិងម៉ូទ័រអគ្គិសនីសរុប 357 hp ដោយកម្លាំងរបស់ម៉ូទ័រអគ្គិសនីមាន 131 hp ហើយកម្លាំងសេះទាំងអស់នេះអាចឲ្យ i8 មួលកប់បានល្បឿនខ្ពស់បំផុត 250 km/h ដោយកម្រិតស្ទុះពីសូន្យទៅ 100km/h ប្រើពេលតែ 4.4s តែប៉ុណ្ណោះ ។
លើសពីនេះ ចំណុចដែលគួរឲ្យចាប់អារម្មណ៍នៅពេលដែលយើងបើកបរលើ E-Drive ដែលពឹងលើម៉ូទ័រអគ្គិសនីសុទ្ធ គឺយើងអាចជាន់ល្បឿនកប់បានរហូតដល់ 120 km/h ឯណោះ ទោះថាមពលអាគុយអាចទ្រទ្រង់ចម្ងាយបានត្រឹម 35km ក៏ដោយ ។ ចំណែកឯ ការសាកថ្មទៅលើអាគុយ ចំពោះរន្ធសាកដែលមានតង់ស្យុង 110v ត្រូវការពេល 3.5 ម៉ោង ប៉ុន្តែប្រសិនជាយើងសាកថ្មក្នុងស្ថានីយដែលមានថាមពលតង់ស្យុង 220v វិញនោះគឺត្រូវការពេលតែជាង ១ ម៉ោងកន្លះតែប៉ុណ្ណោះ ។
គូសបញ្ជាក់ផងដែរថា សម្រាប់តម្លៃនៃ BMW i8 ចាប់ពីសេរី ឆ្នាំ ២០១៤ ទៅ ២០១៥ ប្រហែលខ្ទង់ពី ៨ម៉ឺនទៅ ៩ម៉ឺនដុល្លារឡើងទៅ នៅក្នុងស្រុកខ្មែរ តាមហ្ការ៉ាសនីមួយៗ ។
អត្ថបទ៖ ព្រឹម ភក្ដី
