នៅក្នុង App នេះលោកអ្នកអាចចូលទៅទិញសំបុត្រចូលរួមទស្សនាស៊ីហ្គេមបាន ដោយគ្រាន់តែចូលទៅកាន់ App រួចចុចនៅលើប៊ូតុង Ticket ហើយជ្រើសរើសយកថ្ងៃចូលរួម (ពិធីបើក ឬ ពិធីបិទ) ដោយតម្លៃសំបុត្រគឺមានចាប់ពី 100,០០០ រៀលឡើងសម្រាប់ថ្ងៃបើក រីឯសម្រាប់ថ្ងៃបិទ គឺមានចាប់ពី 50,000រៀលឡើង។ ជាមួយនឹងការចូលទៅទិញសំបុត្រនៅលើ App នេះដែរគឺលោកអ្នកអាចជ្រើសរើសតំបន់កៅអី ដែលលោកអ្នកចង់អង្គុយ ដោយតម្លៃការប្រែប្រួលតាមទីតាំងនោះផងដែរ។

បើយោងតាមការបញ្ជាក់បន្ថែមនៅក្នុង App បានឲ្យដឹងថា ទស្សនិកជនត្រូវតែមកដល់ ហើយអង្គុយមិន លើសពីម៉ោង 4:00 រសៀល។ ការមកដល់លើសពីម៉ោងនេះ នឹង មិនត្រូវបានទទួលយកចូលក្នុងកន្លែងនោះទេ។ ព្រឹត្តិការណ៍នឹង ចាប់ផ្តើមនៅម៉ោង 6:30 ល្ងាច។

ពិធីបើកការប្រកួតកីឡាស៊ីហ្គេមលើកទី៣២ សន្យាថានឹងមានការ សម្ដែងដ៏អស្ចារ្យដែលនឹងបង្ហាញពីមោទនភាពនៃវប្បធម៌ខ្មែរ បេតិកភណ្ឌដ៏សម្បូរបែប និងប្រវត្តិសាស្ត្រក្នុងតំបន់។ ការសម្ដែង ឥតឈប់ឈររយៈពេល 2.5 ម៉ោងនេះ ពីទិដ្ឋភាពវប្បធម៌ផ្សេងៗ និង ការសម្តែងសម័យទំនើបរបស់សិល្បករកម្ពុជាឈានមុខរបស់យើង នឹងរួមបញ្ចូលការច្នៃប្រឌិតចុងក្រោយបំផុតដែលធ្វើអោយ ទស្សនិកជននៅមើលដល់ទីបញ្ចប់ ហើយចង់មើលបន្តបន្ថែមទៀត។

ភ្ញៀវកិត្តិយសទាំងអស់នៅពហុកីឡដ្ឋានមរតក នឹងអាចទស្សនាការ សម្ដែងបានពេញលេញ ដោយមិនមានការរារាំងណាមួយឡើយ ខណៈដែលឆាកនៃការសម្តែងផ្សេងៗនឹងត្រូវបានដាក់បញ្ចូលនូវ ទិដ្ឋភាព 360 ដឺក្រេ។ អ្នកគាំទ្រនឹងមិនខកចិត្តឡើយ ហើយជាផ្នែក មួយនៃប្រវត្តិសាស្ត្រដែលព្រះរាជាណាចក្របានរង់ចាំអស់រយៈពេល64 ឆ្នាំ៕

ទាញយក App

អត្ថបទដោយ៖ ផែន ផាន់ណា