មកទៀតហើយ Lexus NX ស៊េរីឆ្នាំ២០២៤ ចេញមកលើកនេះ មាន ៥ម៉ូដែលដូចឆ្នាំមុនដែរ តែតម្លៃវិញរាងថ្លៃជាងសព្វមួយដង មិនតែប៉ុណ្ណោះចំណែកឯគ្រឿងបញ្ចេញកម្លាំងមាន ៤ ផ្សេងៗគ្នា ព្រមទាំងមាន Hybrid និង Plug-in Hybrid ផងដែរ ។
យោងតាមប្រភពពី Lexus បានឲ្យដឹងថា សម្រាប់ត្រកូល NX គ្រប់ម៉ូដែលទាំងអស់ បានកែកុនត្រង់ផ្នែកបន្តិចបន្តួច និងកញ្ចប់គ្រឿងលេងខ្លះៗទៅតាមម៉ូដែលនីមួយៗ។ ជាក់ស្តែងដូចជាម៉ូដែល NX 350 ប្រភេទ F Sport Luxury គឺមានកញ្ចប់ដែលបន្ថែមនូវ Moonroof ឬ ដំបូងកញ្ចក់ថ្លា Panoramic Glass Roof ។
ជាមួយនឹងអាប់ដេតត្រង់ចំណុចក្តៅ គឺទៅលើតម្លៃ Lexus NX 250 តម្លៃឡើងថ្លៃពី $39,755 ទៅ $40,205 ហើយសម្រាប់ Performance របស់ម៉ូដែលនេះ មាននូវម៉ាស៊ីនចំណុះ ២,៥លីត្រ ៤ ស៊ីឡាំង ដំណើរការដោយប៉ុង ២ AWD ដោយអាចកម្លាំងបាន ២០៣សេះ និងកម្លាំងរមួល ២៤៩ ញ៉ូតុនម៉ែត្រ បូករួមជាមួយប្រអប់លេខ ៨វគ្គអូតូផងដែរ ។
ចំណែកឯ NX 350 នឹងមកដល់នូវ option ប្រភេទ ធម្មតាៗ ដែលរថយន្តអាចដំណើរការដោយប៉ុង២ បាន ព្រមទាំងមានតម្លៃនៅសហរដ្ឋអាមេរិកចាប់ពី $43,965 ត្រូវបានឡើងថ្លៃ $450 ។ ចំពោះ NX 350 សម្រាប់ម៉ូដែល Sport ត្រូវបានភ្ជាប់មកជាមួយនឹង ម៉ាស៊ីន Turbocharged ២,៤លីត្រ ៤ ស៊ីឡាំង ដោយអាចបង្កើតកម្លាំងបាន ២៧៥សេះ និងកម្លាំងរមួល ៤៣០ញ៉ូតុនម៉ែត្រ។
រីឯ NX 35០h មានតម្លៃទាបជាង NX 350 បន្តិច គឺមានតម្លៃចាប់ផ្តើម $43,805 ព្រោះសម្រាប់ម៉ូដែលនេះមិនមាន Turbocharged ទេតែមានជាកញ្ចប់ Hybrid ដែលមានម៉ាស៊ីនចំណុះ ២,៥លីត្រ ៤ ស៊ីឡាំងដូចគ្នា បូកផ្សំជាមួយម៉ូទ័រអគ្គិសនី១ គ្រឿងនៅអ័ក្សក្រោយ ហើយ NX 350h នេះមានកម្លាំងផ្គួបដល់ទៅ ៣០២សេះ បើនិយាយលើកម្រិតសន្សំសំចៃសាំង សម្រាប់បើកលើផ្លូវទូទៅ អាចស៊ីសាំងខ្ទង់ ៦លីត្រ ចំពោះចម្ងាយរត់ ១០០គ.ម ដំបូង ។
សម្រាប់ម៉ូដែលចុងក្រោយគេ ជា NX 450h+ ដែលមានតម្លៃ $58,655 ឡើងថ្លៃ $950 ។សម្រាប់ Performance វិញ NX 450h+ ដូចទៅនឹង NX 350h ដែរ តែមានជម្រើសជា Plug-in Hybrid ដែលត្រូវបានបំពាក់នូវអាគុយទំហំ 18.1Kwh ដែលអាចបើកបានចម្ងាយ 60Km នៅពេលសាកថ្មពេញម្តង ដោយឡែកថ្វីត្បិតតែ ម៉ាស៊ីនដូចគ្នានឹង NX 350h ប៉ុន្តែកម្លាំងម៉ាស៊ីន NX 450h+ ខ្លាំងជាង មានកម្លាំង ៣០២សេះឯណោះ។
អត្ថបទដោយ៖ ព្រឹម ភក្តី