មួយរយ:ពេលនេះ ក្រុមហ៊ុន BYD ហាក់ដូចជាឡើងកូដខ្លាំងណាស់ ឲ្យតែចេញឡានម៉ូដែលថ្មីភ្លាម លក់ដាច់សឹងតែអស់ពីឃ្លាំង ជាក់ស្តែងថ្មីៗនេះ BYD ទើបតែបញ្ចេញឡានកូនកាត់ថ្មីប្រើបច្ចេកវិទ្យា Plug-in Hybrid ក្នុងពេលតែ ៣ថ្ងៃ BYD Han DM ស៊េរីឆ្នាំ២០២៣ លក់បានដល់ចំនួន ១៣៦៩៥គ្រឿង នៅក្នុងប្រទេសចិន ហើយអ្វីដែលពិសេស គឺឡាននេះប្រើលើថាមពលអាគុយសុទ្ធ អាចបើកបានចម្ងាយដល់ទៅ ២០០គ.ម ឯណោះ។ នេះបើយោងតាមគេហទំព័រចិន Carnewschina ដែលបានចេញផ្សាយ។
ប្រភពដែលបានឲ្យដឹងថា កាលពីថ្ងៃទី១៨ ខែឧសភា ឆ្នាំ២០២៣ BYD បានបញ្ចេញឡានកូនកាត់ថ្មីរបស់ខ្លួន ដែលអាចសាកថ្មបាន គឺ BYD Han DM ជាឡានប្រើសាំងផង និងអគ្គិសនីផង។ ឡាននេះមានជម្រើសពិសេសៗ ពីរ គឺ DM-I ប្រើនូវប៉ុងខាងមុខ Front-Wheel Drive ដែលគេបានហៅម៉ូដែលនេះថា Champion Edition និង DM-p ប្រើនូវប៉ុង២ AWD ជាម៉ូដែល Ares Edition ឬ God of War-ព្រះនៃសង្គ្រាម។
ចំពោះ BYD Han DM-i មានម៉ូទ័រអគ្គិសនី ១ អាចបង្កើតកម្លាំងបាន ១៩៧សេះ និងម៉ាស៊ីនសាំងចំំណុះ ១,៥លីត្រ ជំនួយដោយ Turbocharged ដោយម៉ាស៊ីនសាំងនេះអាចផលិតកម្លាំងបាន ១៣៩សេះ និងមានល្បឿនស្ទុះពី ០-១០០គម/ម៉ ប្រើពេល 7.9វិនាទី។
ម្យ៉ាងវិញទៀត សម្រាប់ DM-I ត្រូវបានបំពាក់ជាមួយកញ្ចប់ថ្មទំហំ 18.3kWh អាចរត់បានចម្ងាយ ១២១គ.ម និងកញ្ចប់ថ្មទី២ ទំហំ30.7kWh ប្រភេទ LFP battery ដោយអាចឲ្យឡានប្រើលើអាគុយសុទ្ធ រត់បានចម្ងាយដល់ទៅ ២០០គ.ម បើសម្រាប់ការប្រើរួមគ្នា សាំង ជាមួយអាគុយវិញ ឡានអាចរត់បានចម្ងាយដល់ ១២៦០គ.ម ឯណោះ ដូច្នេះបើគិតពីចម្ងាយផ្លូវ ពីភ្នំពេញទៅសៀមរាប ទៅវិញទៅមក ២ដងឯណោះ។
ចំណែកឯសម្រាប់ DM-p វិញមានចំំណុចច្រើនជាង DM-I ដោយគេត្រូវបានបំពាក់មកជាមួយនឹង ម៉ូទ័រអគ្គិសនីចំនួន ២ មុខក្រោយ អាចផលិតកម្លាំងបាន ៤៩០សេះ និងមានម៉ាស៊ីនសាំងចំណុះ ១,៥លីត្រ ដំណើរការដោយប៉ុង ២ AWD ដែលអាចបង្កើតកម្លាំងបាន ១៣៩សេះ ហើយបើថាមពលទាំងពីរប្រើរួមគ្នា យើងបានកម្លាំងសរុបចំនួន ៥៧៩សេះ និងកម្លាំងរមូរ ៨២២ញ៉ូតុនម៉ែត្រ ហើយសម្រាប់សេះទាំង ៥៧៩ក្បាលនេះ ធ្វើឲ្យឡានអាចស្ទុះពី ០-១០០គ.ម/ម៉ ប្រើពេលតែ ៣,៧វិនាទីតែប៉ុណ្ណោះ។
ដោយឡែកសម្រាប់ Option នេះដែរមានជម្រើសអាគុយតែមួយប៉ុណ្ណោះ គឺមានទំហំ 36kWh ដោយអាចឲ្យឡានរត់លើអាគុយសុទ្ធ បានចម្ងាយ ២០០គ.ម និងការប្រើរួមគ្នា សាំង នឹងអាគុយ ឡានអាចរត់បានចម្ងាយដល់ ១១២០គ.ម ។
គួរជំរាបផងដែរថា BYD Han DM ស៊េរីឆ្នាំ២០២៣ នេះត្រូវបានចេញលក់ជាមួយនឹង ពីរជម្រើស គឺ Campion Edition (DM-I) មានតម្លៃចន្លោះពី ៣៤១០០ដុល្លារ ដល់ ៣៥៥០០ដុល្លារ និង Ares Edition (DM-p) ដែលជាម៉ូដែលកំពូល មានតម្លៃ ៤១២០០ដុល្លារ។
អត្ថបទ៖ ព្រឹម ភក្តី
