Lexus NX ជាតែមរថយន្តរបស់ម៉ាក់យីហោល្បីមួយ ដែលមានមេធំនៅជប៉ុនគឺ Toyota ។ Lexus NX ត្រូវបានបង្កើតឡើងនៅឆ្នាំ ២០១៤ នឹងបន្តការផលិតម៉ូដែលទាំងអស់មកដល់បច្ចុប្បន្ននេះ ។ ជាក់ស្តែង ដូច Lexus NX 450h+ ស៊េរីថ្មីឆ្នាំ ២០២២ នេះ មានចំណុចពិសេសៗ ជាច្រើនដែលធ្វើឲ្យអ្នកខ្លះ ពិបាកចិត្តព្រោះតែអត់លុយទិញជាមួយនឹងតម្លៃក្រៅប្រទេស ៨៩៩០០ ដុល្លារ ។
តួយ៉ាង សម្រាប់ Lexus NX450h+ មួយនេះមកដល់ឆ្នាំនេះ ខាងក្រុមហ៊ុនបំពាក់នូវម៉ូទ័រអេឡិចត្រិចខ្លាំងជាងមុន និងមានទំហំអាគុយក៏ធំជាងមុនដែលធ្វើឲ្យ សមត្ថភាពនៃការស៊ីសាំងក៏តិចជាងមុន ដោយ ១០០គ.ម ស៊ីសាំងតែ ១.៣ លីត្រ តែប៉ុណ្ណោះសម្រាប់អាគុយពេញ ប៉ុន្តែបើអស់ថាមពលហើយ កង់ទាំង៤ អាចរត់បានដោយសារពឹងលើម៉ាស៊ីងសាំងទាំងស្រុងដោយ ១០០ គ.ម ស៊ីសាំងជាង ៥.៦ លីត្រមនោះទេ បើប្រៀបនឹងម៉ូដែលមុន Lexus NX450h+ ឆ្នាំ២០២២ នេះធ្វើបានល្អជាង ។
ចំណែកឯ កម្លាំងម៉ាស៊ីនរបស់ NX450h+ នេះត្រូវបានរួមផ្សំជាមួយនឹងម៉ាស៊ីនសាំង និងម៉ូតទ័រពីរគ្រឿងដែលអាចបង្កើតកម្លាំងសរុបបាន ២២៧ គីឡូវ៉ាត់ ដោយមានរួមចំណែកពីម៉ាស៊ីនសាំង ១៣៧ គីឡូវ៉ាត់ និងកម្លាំងរមូរ ២៧០ ញ៉ូតុនម៉ែត្រ ព្រមទាំងកម្លាំងម៉ូទ័របូកចូលគ្នា ១៧៤ គីឡូវ៉ាត់ ថែមទៀត ។
គូសបញ្ជាក់ផងដែរថា សម្រាប់ការបើកបរនៅលើម៉ូទ័រអគ្គិសនីសុទ្ធ អាចរត់បានចម្ងាយ ៨៧ គ.ម ដោយមិនអស់សាំងសូម្បីតែមួយតំណក់នេះបើយោងតាមការតេស្តសាកល្បងរបស់ NEDC ដោយឡែកគេបានយកវាមកតេស្តសាកល្បងលើផ្លូវធម្មតាវិញ គេបានរកឃើញថា រថយន្តអាចរត់បានតែ ៦៧ គ.ម ទេសម្រាប់ថាមពលអាគុយពេញនោះ ៕
អត្ថបទដោយ៖ ព្រឹម ភក្តី
