តាមរយៈការប្រកាសដែលចេញពីទីស្នាក់ការកណ្តាល Apple Park បានបញ្ជាក់ថា លោក John Ternus ដែលបច្ចុប្បន្នជាអនុប្រធានជាន់ខ្ពស់ផ្នែកវិស្វកម្មផ្នែករឹង (Hardware Engineering) ត្រូវបានជ្រើសរើសជាអ្នកបន្តវេនជា CEO ទី ៥ របស់ក្រុមហ៊ុន Apple ដោយចាប់ផ្តើមជាផ្លូវការពីថ្ងៃទី ១ ខែកញ្ញា ឆ្នាំ ២០២៦ តទៅ។

លោក John Ternus មិនមែនជាមុខមាត់ថ្មីសម្រាប់អ្នកគាំទ្រ Apple នោះទេ ដ្បិតលោកគឺជាអ្នកដឹកនាំដ៏សំខាន់ដែលតែងតែបង្ហាញខ្លួនក្នុងព្រឹត្តិការណ៍សម្ពោធ iPhone, iPad និង Mac ថ្មីៗនាពេលកន្លងមក។ ការតែងតាំងរូបលោក ត្រូវបានគេមើលឃើញថាជាយុទ្ធសាស្ត្រ "រក្សាលំនឹង និងការច្នៃប្រឌិត" ព្រោះលោកគឺជាវិស្វករដ៏ឆ្នើមម្នាក់ដែលមានចំណេះដឹងស៊ីជម្រៅលើផលិតផល Apple។

ទោះបីជាលាលែងពីតំណែងកំពូលក៏ដោយ លោក Tim Cook ដែលមានវ័យ ៦៥ ឆ្នាំ នឹងមិនចាកចេញពីក្រុមហ៊ុនទាំងស្រុងនោះទេ។ លោកនឹងប្តូរទៅកាន់តំណែងជា ប្រធានប្រតិបត្តិនៃក្រុមប្រឹក្សាភិបាល (Executive Chairman) ដែលនឹងបន្តជួយតម្រង់ទិសដៅយុទ្ធសាស្ត្រ និងជួយសម្រួលដល់ការផ្ទេរអំណាចដឹកនាំទៅកាន់លោក Ternus ឱ្យកាន់តែរលូន។

លោក Tim Cook បានឡើងកាន់តំណែងជា CEO តាំងពីឆ្នាំ ២០១១ បន្តពីលោក Steve Jobs។ ក្នុងរយៈពេល ១៥ ឆ្នាំនៃការដឹកនាំ លោកបានធ្វើឱ្យ Apple ក្លាយជាក្រុមហ៊ុនដំបូងគេក្នុងលោកដែលមានតម្លៃទីផ្សារហក់ឡើងដល់ ៤ ទ្រីលានដុល្លារ ($4 Trillion) ក្នុងឆ្នាំ ២០២៥ កន្លងទៅ។ ផលិតផលសំខាន់ៗដែលកើតចេញពីការដឹកនាំរបស់លោកមានដូចជា Apple Watch, AirPods, បន្ទះឈីប Apple Silicon និងចុងក្រោយគឺឧបករណ៍ Vision Pro។

គូសបញ្ជាក់ផងដែរថា ការផ្លាស់ប្តូរមេដឹកនាំនៅពេលនេះ ត្រូវបានមជ្ឈដ្ឋានសេដ្ឋកិច្ចពិភពលោកតាមដានយ៉ាងដិតដល់ ដើម្បីចង់ដឹងថា តើលោក John Ternus នឹងនាំយកបច្ចេកវិទ្យាថ្មីៗអ្វីខ្លះមកបង្ហាញពិភពលោក បន្ទាប់ពីយុគសម័យដ៏ជោគជ័យរបស់លោក Tim Cook។