ម្យ៉ាងទៀតការប្រើប្រាស់ពាក្យសម្ងាត់ដូចជាការដាក់លេខ ដាក់ថ្ងៃ​ ខែ ឆ្នាំកំណើត ឬឈ្មោះក្រុមហ៊ុនណាមួយវាមិនមែនជារឿងល្អនោះទេ។​ ហើយបើតាមការបង្ហាញរបស់​ Phone Arena បានឱ្យដឹងថា​ពាក្យសម្ងាត់ដែលគេពេញនិយមប្រើជាងគេនោះគឺ “password” ដែលពាក្យនេះមានគេប្រើរហូតទៅដល់ជិត 5លាននាក់ ដោយគេជឿថាវាអាចពិបាកសម្រាប់ Hacker។

ប្រភពដដែលក៏បានបន្តទៀតថា សម្រាប់លេខកូដដែលគេកំពុងពេញនិយមមួយទៀតនោះគឺ “123456” និង “123456879” ហើយចំពោះលេខកូដប្រភេទនេះគឺមិនមានសុវត្ថិភាពគ្រប់គ្រាន់សម្រាប់ការពារទូរស័ព្ទឬកុំព្យូទ័រដែលអ្នកទាំងអស់គ្នាកំពុងប្រើប្រាស់នោះទេ។

យ៉ាងណាមិញ Phone Arena ក៏បានបង្ហាញពីរបៀបនៃការកំណត់ពាក្យសម្ងាត់​ដោយមិនងាយមានអ្នកណាម្នាក់អាចដឹងបានហើយចំពោះវិធីក្នុងការដាក់នោះគឺ បញ្ចូលគ្នារវាង (អក្សរធំ អក្សរតូច លេខ សញ្ញា) ហើយប្រសិនបើអ្នកប្រើអក្សរ10តួគឺគេអាចនឹងប្រើពេល 5ខែដើម្បីបំបែកវា ហើយប្រសិនបើប្រើអក្សរ11តួ គឺគេអាចប្រើពេល 34ឆ្នាំដើម្បីបំបែក ប៉ុន្តែប្រសិនបើអ្នកប្រើអក្សរ12តួរួមបញ្ចូលគ្នា​តាមរបៀបខាងលើគឺ Hacker អាចប្រើពេលរហូតទៅដល់ 300ឆ្នាំឯណោះដើម្បីកម្ទេចវា។

ដូច្នេះប្រសិនបើអ្នកកំពុងតែប្រើប្រាស់លេខកូដឬពាក្យសម្ងាត់ដែលងាយៗស្រួលៗ ដូចជាថ្ងៃ ខែ ឆ្នាំកំណើត ឬឈ្មោះជាដើម គួរតែធ្វើការប្តូរវាចេញទៅដោយប្រើប្រាស់ពាក្យសម្ងាត់តាមទម្រង់ខាងលើវិញទើបអាចរក្សាសុវត្ថិភាពបានខ្លាំងជាងមុន។

អត្ថបទដោយ៖ រិន មករា