ដូចដែលអ្នកបានដឹងហើយថា បច្ចេកវិទ្យា AI បច្ចុប្បន្នគឺមានសមត្ថភាពខ្លាំងណាស់ដោយវាអាចជួយកិច្ចការប្រចាំថ្ងៃរបស់មនុស្សបានច្រើន ជាក់ស្តែងយើងសង្កេតឃើញថារឿងដែលគេស្ងើចសរសើរមិនដាច់ពីមាត់នោះគឺបច្ចេកវិទ្យា AI នេះអាចជួយបង្កើតរូបទៅតាមការស្រមើស្រមៃរបស់យើងបានដូចពិតៗតែម្តងពោលគឺគ្រាន់តែបញ្ចូលពាក្យទៅតាមអ្វីដែលយើងចង់បានប៉ុណ្ណោះ។
យ៉ាងណាមិញ ថ្វីត្បិតតែវាអាចបង្កើតរូបភាពទៅតាមការស្រមើស្រមៃរបស់យើងពិតមែនប៉ុន្តែវេបសាយ AI ទាំងអស់នោះគឺអាចអាចបង្កើតបានតែរូបសន្លឹកប៉ុណ្ណោះពោលគឺមិនទាន់អាចបង្កើតបានរូបភាពដែលមានលក្ខណៈ 3D ឬ មានទិដ្ឋភាព 360 ដឺក្រេនៅឡើយទេ។
ហើយថ្ងៃនេះ ចាបខៀវ Technology Cambodia នឹងនាំប្រិយមិត្តទាំងអស់គ្នាទៅស្គាល់ពីវេបសាយAI មួយដែលអាចជួយបង្កើតរូបភាពទៅតាមការស្រមើស្រមៃ និងអាចមើលឃើញទិដ្ឋភាពជុំវិញ 360 ដឺក្រេថែមទៀតផង ដោយវេបសាយនោះមានឈ្មោះថា Blockade Labs ។
សម្រាប់វេបសាយមួយនេះគឺមានលក្ខណៈងាយស្រួលមួយត្រង់ថា មិនចាំបាច់តម្រូវឲ្យយើងចុះឈ្មោះដើម្បីចូលទៅប្រើប្រាស់អីទេ លើសពីនេះទៅទៀតគឺវាមានសមត្ថភាពក្នុងការបង្កើតរូបភាពផ្សេងៗបានដោយគ្រាន់តែយើងបញ្ចូលពាក្យណាដែលយើងចង់ឲ្យវាបង្កើត។
មិនតែប៉ុណ្ណោះវាក៏មានជម្រើសច្រើនដើម្បីឲ្យយើងរើសផងដែរ មានន័យថា ប្រសិនបើយើងចង់បានរស់ជាតិនៃរូបភាពបែបណាគឺគ្រាន់តែរើសទៅតាមប្រភេទនោះជាការស្រេច។ ហើយវាក៏អនុញ្ញាតឲ្យយើងធ្វើការទាញយកទុកមើលផងដែរ ប៉ុន្តែសម្រាប់រូបដែលទាញយកចេញមកគឺជាប្រភេទ jpeg ។
អត្ថបទដោយ៖ រិន មករា
