រឿងក្តីរវាងក្រុមហ៊ុន Apple ជាមួយនឹងប្រទេសប្រេស៊ីល គឺមិនទាន់ចប់នៅឡើយទេ ទាក់ទងជាមួយនឹងការមិនពេញចិត្តពីសំណាក់ប្រទេសប្រេស៊ីលចំពោះ Apple ដែលលក់ iPhone ដោយមិនភ្ជាប់ឆ្នាំងសាកមកជាមួយថែមទាំងមានការប្តឹងផ្តល់និងពិន័យជាប្រាក់រាប់លានដុល្លារថែមទៀតផង។ ដោយឡែកថ្មីៗនេះខាង Apple ឯនោះវិញក៏បានធ្វើការតវ៉ាតបវិញ ថាមិនចង់ឈប់លក់នៅលើទឹកដីប្រេស៊ីលទេ នេះបើយោងតាមការចុះផ្សាយរបស់ Reuters ។
ក្រសួងយុត្តិធម៌នៃប្រទេសប្រេស៊ីល បានធ្វើការពិន័យក្រុមហ៊ុន Apple 2.38លានដុល្លារ ហើយថែមទាំងបញ្ជាឱ្យ Apple ឈប់លក់ iPhone 12 និងម៉ូឌែលថ្មីៗផ្សេងទៀត។ លើសពីនេះទៅទៀតនោះ ថែមទាំងឱ្យក្រុមហ៊ុនមួយនេះផ្អាកការលក់ម៉ូឌែល iPhone មួយណាដែលមិនមានភ្ជាប់មកជាមួយនឹងឆ្នាំងសាកថែមទៀតផង។
យ៉ាងណាមិញ ទាក់ទងជាមួយនឹងការដកឆ្នាំងសាកចេញនេះ បើតាមការចុះផ្សាយរបស់ Bloomberg បានឱ្យដឹងថា Apple បានគិតគូរដល់មនុស្សជាតិក៏ដូចជាអ្វីគ្រប់យ៉ាងនៅលើភពផែនដីរបស់យើង ហើយម្យ៉ាងទៀតដុំសាកនេះគឺបានប្រើប្រាស់ទៅដោយ ជាតិស័ង្កសី និងប្លាស្ទីក ក្នុងចំនួនដ៏ច្រើនលើសលប់ លើសពីនេះទៅទៀតការដកដុំសាកពីប្រអប់ទូរស័ព្ទគឺបានកាត់បន្ថយសារធាតុកាបូនជាង2លានតោន និងអាចកាត់បន្ថយឡានដឹកចំនួន 50ម៉ឺនគ្រឿងចេញផ្លូវផងដែរ។
ផ្ទុយទៅវិញបើទោះបីជាមានការលើកឡើងចេញពី Apple បែបនេះក៏ដោយ ប៉ុន្តែខាងអាជ្ញាធរប្រេស៊ីលនៅតែបដិសេធដដែល ហើយថែមទាំងនិយាយថា គ្មានភ័ស្តុតាងណាដែលអាចបញ្ជាក់បានថា ការលក់ទូរស័ព្ទដោយមិនដាក់ឆ្នាំងសាកមកជាមួយគឺអាចការពារដល់បរិស្ថានបាននោះទេ។
គូសបញ្ជាក់ផងដែរថា បើទោះបីជាមានការបញ្ជាក៏ដូចជាការហាមប្រាមមិនឱ្យលក់ពីសំណាក់ប្រទេសប្រេស៊ីលយ៉ាងណាក៏ដោយក៏ Apple នៅតែមិនចុះចាញ់និងព្រមបន្តធ្វើការជាមួយនឹងភ្នាក់ងារការពារអតិថិជនប្រេស៊ីលដើម្បីដោះស្រាយបញ្ហាមួយនេះទៀត។
ចុងក្រោយ Apple ក៏បាននិយាយថា “ពួកយើងបានយកឈ្នះរឿងក្តីជាច្រើនមកហើយដែលកើតក្នុងប្រទេសប្រេស៊ីល ហើយចំពោះបញ្ហាមួយនេះពួកយើងមានជំនឿយ៉ាងមុតមាំថា អតិថិជនរបស់យើងមានការយល់ដឹងច្បាស់ណាស់ ចំពោះជម្រើសនៃការសាកថ្មទៅលើឧបករណ៍ប្រើប្រាស់របស់គេ” ។
អត្ថបទដោយ៖ រិន មករា
