ក្នុងសម័យឌីជីថលបច្ចុប្បន្ន បណ្ដាញសង្គមបានក្លាយជាកម្លាំងដ៏ខ្លាំងមួយក្នុងការបន្តព័ត៌មាន និងចែករំលែកគំនិតទៅពិភពលោក។ ទោះបីជា Facebook នៅតែជាវេទិកាធំមួយក៏ដោយ ប៉ុន្តែមានបណ្ដាញសង្គមធំៗផ្សេងទៀតផងដែរ ដែលមានឥទ្ធិពលខ្លាំងមិនចាញ់គ្នា ជាក់ស្ដែងដូចជាបណ្ដាញសង្គមទាំង៣ខាងក្រោមនេះ៖
ទី១-X (អតីត Twitter)៖ ជាវេទិការបង្ហោះមតិខ្លីៗ ឬព័ត៌មានទាន់ហេតុការណ៍ ដែលត្រូវបានចែកចាយយ៉ាងលឿន សម្បូរអ្នកប្រើខ្លាំងនៅប៉ែកអឺរ៉ុប។ ថ្នាក់ដឹកនាំកំពូលៗ អ្នកនយោបាយ អ្នកសារព័ត៌មាន អ្នកសិល្បៈ ជនមានឥទ្ធិពល និង Influencers ជាច្រើន ប្រើវាដើម្បីផ្ដល់ព័ត៌មានឆាប់រហ័ស និងបង្កើនសម្លេងរបស់ខ្លួនទៅកាន់ទីសាកលលោក។
ទី២-TikTok៖ ជាវេទិកាវីដេអូខ្លីដែលពេញនិយមខ្លាំង។ បច្ចុប្បន្ន TikTok គឺជាកន្លែងមួយដែលងាយរុញព័ត៌មានទៅកាន់ពិភពលោកលឿនខ្លាំង ប្រសិនបើអ្នកប្រើប្រាស់ចេះពីរបៀបផលិតវីដេអូ និងប្រើប្រាស់ Hashtag (#) បានត្រឹមត្រូវ ឬប្រធានបទដែលគេកំពុងចាប់អារម្មណ៍។
ទី៣-Instagram៖ វេទិកានេះមិនមែនសម្រាប់តែបង្ហោះរូបភាពស្អាតៗប៉ុណ្ណោះទេ ប៉ុន្តែវាជា Platform មួយដែលមានអ្នកប្រើប្រាស់ទូទាំងពិភពលោក។ គេអាចប្រើ Hashtag និង Reels ដើម្បីឱ្យមាតិកា ឬព័ត៌មានដែលគេបង្ហោះ បានឃើញដល់សាធារណៈជន ជាតិនិងអន្តរជាតិ កាន់តែច្រើន។
គួរជាម្រាបផងដែរថា ប្រសិនបើចង់ឱ្យមាតិកា ឬព័ត៌មាន ដែលបង្ហោះចេញទៅ បានដឹងនិងចែករំលែកដោយមនុស្សជុំវិញពិភពលោក គេអាចប្រើប្រាស់ភាសាអង់គ្លេស មិនថាការសរសេរ ឬការនិយាយឡើយ ដើម្បីឱ្យទស្សនិកជន ងាយស្ដាប់យល់ពីអ្វីដែលគេចង់ចែករំលែក៕
