ដូចដែលអ្នកបានដឹងហើយថា បច្ចុប្បន្ននេះមានក្រុមហ៊ុនធំៗជាច្រើនកំពុងសម្រុកទៅលើការអភិវឌ្ឍបច្ចេកវិទ្យា AI ដូចជាក្រុមហ៊ុន OpenAI មាន ChatGPT ក្រុមហ៊ុន Microsoft មាន Bing AI ជាដើមដោយវាមានសមត្ថភាពអាចជួយការងារមនុស្សយើងបានច្រើន។ ដោយឡែកសម្រាប់ Google វិញដែលជាក្រុមហ៊ុនចាស់វស្សាមួយផងនោះ ហាក់បីដូចជាស្ងាត់ទៅបច្ចេកវិទ្យា AI មួយនេះ។
យ៉ាងណាមិញថ្មីៗនេះលោក Sundar Pichai ដែល CEO របស់ក្រុមហ៊ុន Google ផ្ទាល់ក៏បានផ្តល់ដំណឹងសាជាថ្មីដោយបានបង្ហើបថា គេកំពុងតែព្យាយាមធ្វើការអភិវឌ្ឍលើមុខងារនេះហើយ ដែលវាប្រភេទ AI Chatbot ដូចជាមួយនឹង ChatGPT ដែរ ហើយ Google កំពុងធ្វើវាជា Version ខ្លួនឯងតែម្តង ប៉ុន្តែមិនទាន់ដល់ពេលដែលត្រូវចេញ។ នេះបើយោងទៅតាមការចុះផ្សាយរបស់ GSMARENA ។
ប្រភពដដែលក៏បានបន្តថា ក្រុម Deveoper របស់ Google គឺកំពុងតែធ្វើការអភិវឌ្ឍលើមុខងារឆ្លើយឆ្លងគ្នាដូចជាមួយនឹង ChatGPT តែលោក Pichai ក៏បានបន្ថែមទៀតថា សម្រាប់បច្ចេកវិទ្យា AI នេះវានឹងធ្វើឲ្យមនុស្សធ្វើការសន្ទនាជាមួយវាបានស៊ីជម្រៅ ឬហៅជាភាសាបច្ចេកទេសថា LLM-power bot( large language model)។
លើសពីនេះទៅទៀត លោក Pichai បានសម្លឹងមើលឃើញឱកាសមាសនេះ ដោយរំពឹងថា Google នឹងអាចក្តោបក្តាប់យកចំណែកទីផ្សារលើស 93% នៅក្នុងទីផ្សារ Search Engine នេះ មិនតែប៉ុណ្ណោះពេលដែល Google បញ្ចេញបច្ចេកវិទ្យា AI នេះគឺអាចនឹងមានឥទ្ធិពលខ្លាំងជាង ChatGPT ក៏ដូចជា Bing របស់ក្រុមហ៊ុន Microsoft ផងដែរ។
ប៉ុន្តែទោះបីជាយ៉ាងណាក៏ដោយគេនៅមិនទាន់បញ្ជាក់ពីពេលវេលាច្បាស់លាស់ក្នុងការបញ្ចេញបច្ចេកវិទ្យា AI នេះដើម្បីឲ្យមនុស្សទូទៅប្រើប្រាស់នោះដែរ។
អត្ថបទដោយ៖ រិន មករា
