ការទិញរថយន្តដំបូងជាបទពិសោធន៍ដ៏រំភើប ប៉ុន្តែវាក៏ទាមទារការពិចារណាឱ្យបានហ្មត់ចត់ដែរ។ ដើម្បីជួយអ្នកឱ្យធ្វើការសម្រេចចិត្តបានត្រឹមត្រូវ នេះជាចំណុចសំខាន់ៗ ៥ យ៉ាងដែលអ្នកគួរដឹង៖

១. កំណត់ថវិកាដែលច្បាស់លាស់

មុននឹងចាប់ផ្ដើមមើលរថយន្តណាមួយ អ្នកត្រូវតែកំណត់ថវិការបស់អ្នកជាមុនសិន។ ថវិកានេះមិនមែនត្រឹមតែតម្លៃរថយន្តប៉ុណ្ណោះទេ តែត្រូវគិតបញ្ចូលទាំង៖

• តម្លៃរថយន្ត: តើអ្នកអាចចំណាយប៉ុន្មានលើការទិញដំបូង?
• ការប្រាក់ (បើសិនជាបង់រំលស់): គិតគូរពីអត្រាការប្រាក់ និងរយៈពេលបង់។
• ថ្លៃចំណាយប្រតិបត្តិការ: ថ្លៃប្រេងឥន្ធនៈ ថ្លៃបង់ពន្ធផ្លូវប្រចាំឆ្នាំ ថ្លៃធានារ៉ាប់រង និងថ្លៃថែទាំជាប្រចាំ។ ឧទាហរណ៍ រថយន្ត SUV អាចនឹងស៊ីសាំងច្រើនជាងរថយន្ត Sedan តូច ហើយថ្លៃបង់ពន្ធក៏អាចខុសគ្នាដែរ។

ការកំណត់ថវិកាឱ្យបានច្បាស់លាស់នឹងជួយអ្នកក្នុងការកាត់បន្ថយជម្រើស និងផ្តោតលើរថយន្តដែលសាកសមនឹងហិរញ្ញវត្ថុរបស់អ្នក។

២. វាយតម្លៃតម្រូវការផ្ទាល់ខ្លួន

កុំទិញរថយន្តដោយគ្រាន់តែឃើញគេទិញ ឬឃើញថាស្អាត។ អ្នកត្រូវសួរខ្លួនឯងថា៖

• អ្នកប្រើរថយន្តសម្រាប់អ្វី? សម្រាប់ធ្វើការ? ជូនកូនទៅសាលា? ធ្វើដំណើរកម្សាន្ត? ដឹកឥវ៉ាន់
• ចំនួនអ្នកដំណើរធម្មតា: តើអ្នកតែងតែធ្វើដំណើរតែម្នាក់ឯង ឬជាមួយគ្រួសារដែលមានសមាជិកច្រើន? បើអ្នកមានកូនតូចៗ ប្រហែលជាត្រូវការកៅអីកុមារ ដែលទាមទារកន្លែងធំទូលាយបន្តិច។
• ប្រភេទផ្លូវដែលត្រូវបើកបរ: តើអ្នករស់នៅទីក្រុងដែលមានផ្លូវកៅស៊ូស្អាត ឬនៅតាមជនបទដែលមានផ្លូវលំបាក? រថយន្តប្រភេទ Sedan សមសម្រាប់ផ្លូវក្រាលកៅស៊ូ ខណៈ SUV ឬ Pick-up សមសម្រាប់ផ្លូវលំបាក។
• ការយល់ដឹងពីតម្រូវការទាំងនេះនឹងជួយអ្នកជ្រើសរើសប្រភេទរថយន្ត (Sedan, SUV, Pickup Truck) ដែលត្រឹមត្រូវ។

៣. ពិចារណារវាងរថយន្តថ្មី និងរថយន្តមួយទឹក

ជម្រើសរវាងរថយន្តថ្មី និងមួយទឹក មានគុណសម្បត្តិ និងគុណវិបត្តិរៀងៗខ្លួន៖

រថយន្តថ្មី:

•  គុណសម្បត្តិ: មានការធានារោងចក្ររយៈពេលវែង មិនសូវមានបញ្ហាជួសជុលភ្លាមៗ មានបច្ចេកវិទ្យាទំនើប និងមានជម្រើសពណ៌ច្រើន។
•  គុណវិបត្តិ: តម្លៃថ្លៃជាង នឹងចុះថ្លៃលឿននៅពេលចេញពីហាង។

រថយន្តមួយទឹក (Used Car):

• គុណសម្បត្តិ: តម្លៃធូរថ្លៃជាង អាចសន្សំប្រាក់បានច្រើន។ តម្លៃមិនសូវចុះលឿនដូចរថយន្តថ្មី។
•  គុណវិបត្តិ: អាចមានបញ្ហាគ្រឿងបន្លាស់ ឬត្រូវជួសជុលច្រើនជាងរថយន្តថ្មី។ គ្មានការធានារោងចក្រ។

ប្រសិនបើអ្នកជ្រើសរើសរថយន្តមួយទឹក ត្រូវតែនាំជាងជំនាញទៅជួយត្រួតពិនិត្យឱ្យបានម៉ត់ចត់ មុននឹងសម្រេចចិត្តទិញ ដើម្បីចៀសវាងបញ្ហានៅពេលក្រោយ។

៤. ធ្វើការស្រាវជ្រាវ និងប្រៀបធៀប

កុំប្រញាប់ទិញ។ ចំណាយពេលស្រាវជ្រាវម៉ូដែលរថយន្តផ្សេងៗគ្នាដែលសាកសមនឹងថវិកា និងតម្រូវការរបស់អ្នក។

• អានការវាយតម្លៃ (Reviews): មើលការវាយតម្លៃពីរថយន្តដែលអ្នកចាប់អារម្មណ៍ពីអ្នកជំនាញ ឬអ្នកប្រើប្រាស់ផ្សេងទៀត។
• ប្រៀបធៀបតម្លៃ: ចូលទៅកាន់ showroom ឬហាងលក់រថយន្តមួយទឹកជាច្រើនកន្លែង ដើម្បីប្រៀបធៀបតម្លៃ និងគុណភាព។
• ព័ត៌មានបច្ចេកទេស: ស្វែងយល់ពីលក្ខណៈពិសេសរបស់រថយន្ត ដូចជាប្រសិទ្ធភាពស៊ីសាំង ប្រព័ន្ធសុវត្ថិភាព និងបច្ចេកវិទ្យាផ្សេងៗ។

៥. បើកបរសាកល្បង និងត្រួតពិនិត្យឯកសារ

ចំណុចនេះមានសារៈសំខាន់ខ្លាំងណាស់៖

បើកបរសាកល្បង (Test Drive): ត្រូវបើកបរសាកល្បងរថយន្តដែលអ្នកចាប់អារម្មណ៍។ អំឡុងពេលបើកបរសាកល្បង សូមយកចិត្តទុកដាក់លើ៖

• ប្រព័ន្ធចង្កូត: តើវាស្រាល ឬធ្ងន់? មានលំនឹងល្អទេ?
• ប្រព័ន្ធហ្វ្រាំង: តើហ្វ្រាំងស៊ីល្អ?
• ម៉ាស៊ីន និងប្រអប់លេខ: តើមានសម្លេងប្លែក ឬដំណើរការមិនរលូនទេ?
• ម៉ាស៊ីនត្រជាក់: ត្រជាក់ល្អទេ?
• សម្លេងប្លែកៗ: តើមានសម្លេងក្រាកៗ ឬសម្លេងខុសប្រក្រតីផ្សេងទៀតទេ?

ត្រួតពិនិត្យឯកសារ: ត្រូវប្រាកដថាឯកសាររថយន្តមានគ្រប់គ្រាន់ និងស្របច្បាប់ដូចជា ប័ណ្ណសម្គាល់យានយន្ត (Registration Card) ពន្ធផ្លូវ និងឯកសារផ្ទេរកម្មសិទ្ធិ។

គូសបញ្ជាក់ផងដែរថា ការយល់ដឹងពីចំណុចសំខាន់ៗទាំង ៥ នេះនឹងជួយអ្នកឱ្យទិញរថយន្តដំបូងបានដោយទំនុកចិត្ត និងទទួលបានរថយន្តដែលសាកសមបំផុតសម្រាប់អ្នក។

 អត្ថបទដោយ៖ ងួន ឃុនណា