បច្ចេកវិទ្យា AI កំពុងដើរតួយ៉ាងសំខាន់ក្នុងការចូលខ្លួនមកជួយដោះស្រាយបញ្ហាក៏ដូចជាជួយសម្រួលការងារប្រចាំថ្ងៃរបស់មនុស្សយើង ជាក់ស្តែងបច្ចុប្បន្នមាន AI Chatbot ២ ដែលកំពុងលេចធ្លោក៏ដូចជាមានការពេញនិយមប្រើប្រាស់ច្រើនគឺ ChatGPT និង Microsoft Bing ជាដើម។ មិនតែប៉ុណ្ណោះវាក៏អាចជួយសម្រួលកិច្ចការសាលារបស់យើងបានច្រើនជាងមុនផងដែរ។
ដោយឡែកថ្ងៃនេះ ចាបខៀវ Technology Cambodia នឹងនាំបងប្អូនទាំងអស់គ្នាជាពិសេសបងប្អូនសិស្សនិស្សិតឲ្យមកស្គាល់ AI Chatbot មួយគឺ Microsoft Bing ដែលដំណើរការដោយ ChatGPT ដើម្បីឲ្យវាមកជួយការងារ Assignment របស់យើងកុំឲ្យពិបាកធ្វើយឺតមិនទាន់ឲ្យគ្រូទៀត។
អ្វីទៅជា Microsoft Bing
ចំពោះ Bing គឺជាប្រភេទមួយ Search Engine មួយប្រភេទរបស់ក្រុមហ៊ុន Microsoft ហើយឥឡូវ Bing គេបានបញ្ចូលជាមួយបច្ចេកវិទ្យា AI ដើម្បីឲ្យវាធ្វើការកាន់តែឆ្លាតជាងមុន និងលឿនជាមុនផងដែរពោលគឺបច្ចុប្បន្នគេហៅវាថា Bing AI ដោយវាបានដំណើរការជាមួយនឹង ChatGPT ជាពិសេស GPT-4ដែលជា Chatbot ជំនាន់ថ្មីរបស់ក្រុមហ៊ុន OpenAI ផងដែរ។
ធ្វើយ៉ាងណាទើបអាចប្រើបាន?
ចំពោះការប្រើប្រាស់ អ្នកទាំងអស់គ្នាអាចប្រើបានទាំងនៅលើទូរស័ព្ទនិងនៅលើកុំព្យូទ័រ ហើយឥឡូវនេះគឺមិនត្រូវការរង់ចាំ(Waitlist) ដូចមុនទេពោលគឺគ្រាន់តែមានគណនីមួយគឺអាចប្រើបានហើយ។ ខាងក្រោមគឺជារបៀបប្រើប្រាស់៖
តាមទូរស័ព្ទដៃ
- ចូលទៅកាន់ Play Store ឬ App Store រួចទាញយក Bing ដើម្បីដំឡើងដាក់នៅលើទូរស័ព្ទដៃ
- បន្ទាប់ពីតំឡើងរួចហើយវានឹងលោតផ្ទាំងមួយជាមួយនឹងពាក្យ Sign in and join
- ដូច្នេះយើងគ្រាន់តែបញ្ចូលគណនី Microsoft របស់យើងចូលជាការស្រច
- បន្ទាប់មកយើងអាចប្រើប្រាស់ជាមួយ Bing AI ឲ្យធ្វើការងារបានហើយ។
តាមកុំព្យទ័រ
សម្រាប់កុំព្យូទ័រអ្នកទាំងអស់គ្នាត្រូវតែទាញយក Microsoft Edge មកតំឡើងសិន បន្ទាប់មកធ្វើការបញ្ចូលគណនីជាមួយនឹង Bing គឺយើងអាចប្រើបានហើយ ពោលគឺដូចគ្នាជាមួយនឹងទូរស័ព្ទដែរ។
វាមានមុខងារអ្វីខ្លះ?
សម្រាប់ Bing AI បើនៅលើទូរស័ព្ទគឺមានតែមុខងារសួរសំណួរទូទៅដូច ChatGPT ដែរ ដែលវាអាចឆ្លើយបានសឹងតែគ្រប់សំណួរទាំងអស់ជាមួយនឹងការប្រមូលទិន្នន័យផ្សេងៗពីគ្រប់ប្រភពដើម្បីសង្ខេបឲ្យយើងងាយយល់ និងប្រកបដោយភាពច្នៃប្រឌិត ហើយថែមទាំងដាក់ប្រភពឲ្យយើងមើលទៀត។
សម្រាប់នៅលើកុំព្យូទ័រវិញគឺមានយើងអាចប្រើបានមុខងារច្រើនជាមួយ Bing តួយ៉ាងការសួរសំណួរក៏វាឲ្យយើងជ្រើសប្រភេទនៃការឆ្លើយដូចជាមួយនឹងទូរស័ព្ទដែរ ដូចជាប្រភេទចម្លើយបែប Creative, Balanced ឬ Precise ជាដើម។
ក្រៅពីមុខងារ Chat គឺវាមានមុខងារមួយទៀតគឺ Compose ដោយវាអាចជួយយើងក្នុងការសរសេរ Paragraph សរសេរ Email, Blog Post ឬជួយបង្កើតជាគំនិតផ្សេងៗបានទៀតដោយយើងគ្រាន់តែបញ្ចូលនូវអ្វីដែលយើងចង់បានជាការស្រេច។ មិនតែប៉ុណ្ណោះយើងក៏អាចកំណត់ពីប្រភេទចម្លើយដែលវានឹងឆ្លើយមកក៏បានដែរ ដូចជាប្រភេទផ្លូវការ បែបផ្តល់ព័ត៌មាន ឬបែបសប្បាយជាដើម។
ដូច្នេះសម្រាប់បងប្អូនជាពិសេសសិស្សនិស្សិតគឺអាចសាកល្បងប្រើប្រាស់ជាមួយ AI Chatbot មួយនេះបានដើម្បីជួយសម្រួលការងារប្រចាំថ្ងៃឲ្យកាន់តែប្រសើជាងមុន យល់ដឹងពីការប្រើប្រាស់បច្ចេកវិទ្យាដើម្បីដើរឲ្យទាន់សម័យកាលកាន់តែលឿនជាងមុនផងដែរ។
គូសបញ្ជាក់ផងដែរថា អ្នកទាំងអស់គ្នាគឺអាចប្រើប្រាស់វាដើម្បីជាជំនួយក្នុងការបង្កើតគំនិតច្នៃប្រឌិតថ្មីៗ តែខ្ញុំក៏មិនលើកទឹកចិត្តឲ្យប្រើប្រាស់វាដើម្បីជំនួសគ្រប់កិច្ចការទាំងអស់នោះដែរ ព្រោះវាអាចបាត់បង់ភាពច្នៃប្រឌិតចេញពីខ្លួនឯងក៏ថាបាន។
អត្ថបទដោយ៖ រិន មករា