នៅថ្ងៃទី២៩ ខែមេសា​ ឆ្នាំ២០២៥ យោងតាមការចុះផ្សាយរបស់សារព័ត៌មាន Forbes បានប្រាប់ឲ្យដឹងថា ក្រុមហ៊ុន UPS បានប្រកាសកាលពីថ្ងៃអង្គារថា ខ្លួននឹងបញ្ឈប់បុគ្គលិកចំនួន ២០,០០០ នាក់ នៅឆ្នាំនេះ ទោះបីជាខ្លួនបានលើសការព្យាករណ៍ប្រាក់ចំណេញសម្រាប់ត្រីមាសទី ១ ក៏ដោយ ដោយសារក្រុមហ៊ុនដឹកជញ្ជូនយក្សនេះរំពឹងថានឹងមានការធ្លាក់ចុះនៃការដឹកជញ្ជូន បន្ទាប់ពីកាត់បន្ថយការដឹកជញ្ជូនសម្រាប់ក្រុមហ៊ុន Amazon ពាក់កណ្តាលកាលពីដើមឆ្នាំនេះ។

ក្រុមហ៊ុន UPS រំពឹងថានឹងសន្សំបាន ៣.៥ ពាន់លានដុល្លារនៅឆ្នាំ ២០២៥ បន្ទាប់ពីកាត់បន្ថយបុគ្គលិក ២០,០០០ នាក់ និងបិទអាគារដែលជួល និងជាកម្មសិទ្ធិផ្ទាល់ខ្លួនចំនួន ៧៣ កន្លែង ត្រឹមចុងខែមិថុនា នេះបើយោងតាមរបាយការណ៍ប្រាក់ចំណូលត្រីមាសទី ១ របស់ក្រុមហ៊ុន។

ការបញ្ឈប់បុគ្គលិក និងការបិទអាគារនេះ ធ្វើឡើងបន្ទាប់ពីអ្វីដែលក្រុមហ៊ុន UPS បាននិយាយថា គឺជា "ការរំពឹងទុកបរិមាណការងារទាបជាងមុនពីអតិថិជនធំបំផុតរបស់យើង" គឺក្រុមហ៊ុន Amazon ដែលក្រុមហ៊ុន UPS បានប្រកាសកាលពីខែមករាថា បរិមាណដឹកជញ្ជូនរបស់ខ្លួនជាមួយក្រុមហ៊ុននេះ នឹងត្រូវកាត់បន្ថយពាក់កណ្តាលនៅត្រឹមឆ្នាំ ២០២៦។

ក្រុមហ៊ុន UPS ដែលភាគហ៊ុនរបស់ខ្លួនបានកើនឡើងប្រហែល ១% នៅក្នុងការជួញដូរមុនបើកទីផ្សារ ប្រាក់ចំណូលត្រីមាសទី ១ ចំនួន ២១.៥ ពាន់លានដុល្លារ និងប្រាក់ចំណេញកែសម្រួលក្នុងមួយហ៊ុនចំនួន ១.៤៩ ដុល្លារ ដែលលើសពីការរំពឹងទុករបស់ក្រុមអ្នកវិភាគចំនួន ២១.០៥ ពាន់លានដុល្លារ និង ១.៣៨ ដុល្លារ នេះបើយោងតាម FactSet ។

ការបញ្ឈប់បុគ្គលិកចុងក្រោយនៅក្រុមហ៊ុន UPS នេះ ធ្វើឡើងបន្ទាប់ពីក្រុមហ៊ុនបានប្រកាសកាលពីខែមករាថា ខ្លួននឹងកាត់បន្ថយអាជីវកម្មភាគច្រើនរបស់ខ្លួនជាមួយក្រុមហ៊ុន Amazon ។ ការសម្រេចចិត្តរបស់ក្រុមហ៊ុនក្នុងការកាត់បន្ថយបរិមាណដឹកជញ្ជូនពីក្រុមហ៊ុន Amazon នឹងអនុញ្ញាតឱ្យក្រុមហ៊ុន UPS ពង្រីកប្រាក់ចំណេញរបស់ខ្លួន។