យោងតាមការចុះផ្សាយរបស់សារព័ត៌មាន BBC បានប្រាប់ឲ្យដឹងថា ប្រធានាធិបតីអាមេរិកលោក ដូណាល់ ត្រាំ បានបង្ហាញសញ្ញាបន្ទន់ឥរិយាបថចំពោះការថ្លែងមតិថ្មីៗរបស់លោកលើប្រទេសចិន និងប្រធានធនាគារបម្រុងសហព័ន្ធអាមេរិក បន្ទាប់ពីការប៉ះទង្គិចគ្នានាពេលថ្មីៗនេះ ខណៈលោកកំពុងជំរុញរបៀបវារៈសេដ្ឋកិច្ចរបស់លោក។
លោក ត្រាំ បានថ្លែងថា លោក "គ្មានចេតនាបណ្ដេញ" លោក ចេរ៉ូម ផោវែល ទេ បន្ទាប់ពីរិះគន់ប្រធានធនាគារកណ្ដាលរូបនេះជាច្រើនដង ប៉ុន្តែបានបន្ថែមថា លោកចង់ឲ្យលោក ផោវែលមាន "សកម្មជាងនេះបន្តិច" ក្នុងការកាត់បន្ថយអត្រាការប្រាក់។ ថ្លែងនៅក្នុងការិយាល័យសតវិមានកាលពីថ្ងៃអង្គារ លោក ត្រាំ ក៏បានថ្លែងផងដែរថា លោកមានសុទិដ្ឋិនិយមចំពោះការកែលម្អទំនាក់ទំនងពាណិជ្ជកម្មជាមួយប្រទេសចិន។
លោកត្រាំ បានបន្តទៀតថា កម្រិតពន្ធគយ ឬពន្ធនាំចូល ដែលលោកបានដាក់លើទំនិញនាំចូលរបស់ចិន "នឹងធ្លាក់ចុះយ៉ាងច្រើន ប៉ុន្តែនឹងមិនសូន្យទេ"។
លោក Trump បានដំឡើងអត្រាពន្ធលើទំនិញចិនដល់ ១៤៥% ដែលបង្កឱ្យមានវិធានការឆ្លើយតបពីទីក្រុងប៉េកាំង និងការព្រមានពីអ្នកសេដ្ឋកិច្ចអំពីផលប៉ះពាល់ជាសកលនៃសង្គ្រាមពាណិជ្ជកម្ម។
នៅក្នុងការអត្ថាធិប្បាយរបស់លោកត្រាំ ទៅកាន់អ្នកសារព័ត៌មានកាលពីថ្ងៃអង្គារ ដោយលោកបាននិយាយថាគាត់នឹង "រួសរាយរាក់ទាក់ខ្លាំងណាស់" ក្នុងការចរចាជាមួយទីក្រុងប៉េកាំង ក្នុងក្តីសង្ឃឹមនៃការធានាបាននូវកិច្ចព្រមព្រៀងពាណិជ្ជកម្មដ៏ល្អឡើងវិញ។
