ដោយយោងទៅតាមការចុះផ្សាយរបស់​ TheVerge បានបង្ហាញថា TikTok បានធ្វើការចុះបញ្ជីអាជីវកម្មលើកម្មវិធីថ្មីរបស់ខ្លួនមួយទៀតគឺ​ TikTok Music នៅលើទឹកដីអាមេរិក ហើយចំពោះ​កម្មវិធីថ្មីនេះគឺអនុញ្ញាតឱ្យអ្នកប្រើប្រាស់អាច ស្តាប់​ អាចចែករំលែក អាចទិញ ក៏ដូចជាទាញយកចម្រៀងដែលខ្លួនពេញចិត្តស្តាប់បានថែមទៀតផង។

យ៉ាងណាមិញចំពោះកម្មវិធីថ្មីនេះគឺមិនមែនជារឿងថ្មីសន្លាងរបស់ក្រុមហ៊ុន ByteDance នោះទេពោលគឺ ក្រុមហ៊ុនមេមួយនេះ​ក៏ធ្លាប់បានបង្កើតកម្មវិធីចាក់ចម្រៀងពីមុនមកដែរដោយកាលពីឆ្នាំ2020កន្លងទៅ ByteDance បានបញ្ចេញកម្មវិធីចាក់ចម្រៀងមួយឈ្មោះថា Resso  ដែលបានដាក់ឱ្យប្រើប្រាស់តែនៅ ឥណ្ឌា ប្រេហ្ស៊ីល ឥណ្ឌូនេស៊ី តែប៉ុណ្ណោះ​ ហើយចំពោះមុខងារមួយចំនួនគឺដូចគ្នាទៅនឹង TikTok Music ដែរ។

លើសពីនេះទៅទៀត ByteDance បានធ្វើការភ្ជាប់កម្មវិធី Resso សម្រាប់ប្រទេសដែលអាចប្រើប្រាស់បានជាមួយនឹង TikTok ផ្ទាល់តែម្តងដែលមានន័យថា ពេលដែលគេមើលវីដេអូដែលពេញនិយមណាមួយហើយ​គឺគេអាចចូលទៅស្តាប់ចម្រៀងពេញបានថែមទៀតផងនៅលើ Resso ។

ប្រភពដដែលបានបន្តថា Resso មានអ្នកប្រើប្រាស់ប្រចាំខែរហូតដល់ជាង40លានឯណោះនៅឆ្នាំ 2021ក្នុងប្រទេសទាំង3ដែលបានដាក់ឱ្យប្រើប្រាស់ ក្នុងចំនួននេះផងដែរគឺកើនឡើងរហូតដល់ 304% ចាប់ពីដើមខែមករា 2021 រហូតដល់ ដើមខែមករា 2022 តែផ្ទុយទៅវិញ​ចំពោះផ្លេតហ្វម Spotify ដែលជារលកមុនគឺកើនឡើងអ្នកប្រើប្រាស់ត្រឹមតែ38% តែប៉ុណ្ណោះ។

គូសបញ្ជាក់ផងដែរថា​សម្រាប់ផ្លេតហ្វមថ្មី TikTok Music នេះគឺគេពុំទាន់ដឹងថា​អាចនឹងយកលំនាំតាម Resso ឬអត់នោះទេ។ ហើយសម្រាប់អ្នកទាំងអស់គ្នាវិញគិតផ្លេតហ្វមថ្មីនេះ អាចនឹងផ្តួល​ Spotify ឬក៏ Apple Music បានដែរឬទេ?

អត្ថបទដោយ៖ រិន មករា