កាលពីពេលថ្មីៗនេះ ក្រុមហ៊ុន Tesla ទើបតែបញ្ចេញនូវផលិតផលថ្មី គឺរទេះសូឡាសាកថ្មឡានអគ្គិសនី ដោយដាក់តាំងបង្ហាញនៅក្នុងកម្មវិធី IdeenExpo ក្នុងទីក្រុង Hannover ប្រទេសអាល្លឺម៉ង់ ។
បើយោងតាមការចុះផ្សាយរបស់គេហទំព័រ Electrek.co បានឲ្យដឹងថា រទេះនេះ អាចដំណើរការបានដោយការស្រូបនូវពន្លឺព្រះអាទិត្យតាមរយ:បន្ទះសូឡារួចបំលែងវាទៅជាថាមពលអគ្គិសនីសុទ្ធដើម្បីផ្តល់ថាមពលទៅកាន់ថ្ម ។
មិនតែប៉ុណ្ណោះ រទេះសូឡានេះ ត្រូវបានបំពាក់ជាមួយប្រព័ន្ធអ៊ីនធឺណេតលើមេឃរបស់ Starlink ថែមទៀតផង ដែលផ្តល់នូវភាពខាងស្រួល នៅពេលចូលព្រៃ ឡើងភ្នំ ឬក៏ទៅណាឆ្ងាយនៅតំបន់ដាច់ស្រយាលគ្មានភ្លើងអគ្គិសនីទៅដល់ រទេះសូឡារបស់Tesla មួយនេះអាចជួយបាន ព្រមទាំងផ្តល់នូវអ៊ីនធឺណេតល្បឿនលឿនពីលើមេឃដោយមិនខ្វល់ខ្វាយពីសេវាអ៊ីនធឺណេតទូរស័ព្ទឡើយ ។
មួយវិញទៀតរទេះសូឡានេះអាចផ្ទុកបានថ្មចំនួន ៣០០វ៉ាត់ ដែលជាប្រភេទថ្ម 4680 ខ្នាតធំរបស់ក្រុមហ៊ុន Tesla ប៉ុន្តែចំពោះថាមពលដែលបញ្ចូនទៅកាន់ថ្មបានតិចតួចណាស់ ដោយ ១ថ្ងៃ រទេះសូឡានេះអាចបញ្ចូលថាមពលបានតែ ២.៧ គីឡូវ៉ាត់នោះទេ បើគិតជាចម្ងាយបើកបរវិញអាចរត់បានចន្លោះពី ៦៤ ទៅ ៨០ គីឡូម៉ែត្រ នេះបើតាមការបើកតេស្តលើរថយន្ត Tesla Model Y ។
ថ្វីត្បិតតែវាមានអត្ថប្រយោជន៍ច្រើនពិតមែនប៉ុន្តែការអភិវឌ្ឍលើឧបករណ៍នេះមិនទាន់បានពេញលេញនៅឡើងទេ ពោលគឺក្រុមហ៊ុន Tesla ត្រូវការពេលស្រាវជ្រាវបន្ថែមទៀតលើបច្ចេកវិទ្យាសូឡា ដើម្បីឲ្យវាអាចទាញយកថាមពលពីព្រះអាទិត្យបានកាន់តែច្រើន និងលឿនជាងមុន ។
គួរជំរាបផងដែរ រទេះសូឡា គឺមិនទាន់បង្ហាញជាផ្លូវការនោះទេ ដោយាសារនេះគ្រាន់តែជាការបង្កើតឡើងរបស់វិស្វករ Tesla នៅរោងចក្រនៃប្រទេសអាល្លឺម៉ង់ ដើម្បីយកមកដាក់តាំងបង្ហាញនៅពិព័រណ៍តែប៉ុណ្ណោះ ។ ម្យ៉ាងវិញគម្រោងការដាក់បន្ទះសូឡាលើរថយន្តអគ្គិសនីនេះ មានក្រុមហ៊ុនចំនួន ៣ កំពុងតែរកស៊ីលើផ្លូវនេះយ៉ាងជោគជ័យ ក្នុងនោះរួមមាន Aptera Sono និង Lightyear ៕
អត្ថបទដោយ៖ ព្រឹម ភក្តី
