នៅក្នុងព្រឹត្តិការណ៍ "We Robot" របស់ក្រុមហ៊ុន Tesla នៅទីក្រុង Burbank រដ្ឋកាលីហ្វ័រញ៉ា កាលពីដើមសប្តាហ៍នេះ លោក Elon Musk នាយកប្រតិបត្តិក្រុមហ៊ុនបានបង្ហាញចក្ខុវិស័យអនាគតកាលរបស់ក្រុមហ៊ុន ជាមួយនឹងតាក់ស៊ីដឹកនាំដោយស្វ័យប្រវត្តិ Cybercab ដែលត្រូវបានរង់ចាំយ៉ាងខ្លាំង និងរថយន្តធំជាងនេះមួយទៀត គឺ Cybervan។ យានយន្តទាំងពីរនេះហាក់ដូចជាមកពីកុនវិទ្យាសាស្ត្រ ដោយតំណាងឱ្យពាក្យស្លោករបស់លោក Musk ដែលថា "អនាគតគួរតែមើលទៅដូចជាអនាគត"។
ទោះយ៉ាងណាក៏ដោយ ចំណុចសំខាន់នៃព្រឹត្តិការណ៍នេះគឺមនុស្សយន្ត Optimus Gen 2 របស់ Tesla ដែលបានចូលរួមជាមួយភ្ញៀវដោយការបម្រើភេសជ្ជៈ និយាយជជែក និងសូម្បីតែរាំ។ មនុស្សយន្ត Optimus ដែលដំបូងឡើយត្រូវបានគេលើកឡើងថាជាការជំនួសកម្មករោងចក្រ ត្រូវបានគេរំពឹងថានឹងចាប់ផ្តើមធ្វើការនៅរោងចក្រ Tesla នៅឆ្នាំ២០២៥ និងអាចប្រើប្រាស់បានសម្រាប់ក្រុមហ៊ុនផ្សេងទៀតនៅឆ្នាំ២០២៦។
លោក Musk បានពន្យល់បន្ថែមអំពីចក្ខុវិស័យរបស់លោកសម្រាប់ Optimus ដោយលើកឡើងថា មនុស្សយន្តនេះអាចក្លាយជាអ្នកជំនួយការក្នុងផ្ទះ ដែលអាចមើលថែទាំកុមារ ដើរលេងសុនខ កាត់ស្មៅ និងដើរទិញឥវ៉ាន់។ លោកក៏បានប៉ាន់ស្មានថា នៅពេលដែលផលិតកម្មកើនឡើង Optimus នឹងមានតម្លៃចន្លោះពី ២០,០០០ ទៅ ៣០,០០០ ដុល្លារ ដែលផ្តល់នូវជម្រើសដែលមានតម្លៃសមរម្យជាងមនុស្សយន្តបម្រើការងារផ្ទះដែលមានតម្លៃថ្លៃនាពេលបច្ចុប្បន្ន។
ក្រុមហ៊ុន Tesla បានសង្កត់ធ្ងន់លើភាពបន្តគ្នានៃបច្ចេកវិទ្យារវាងរថយន្តនិងមនុស្សយន្តរបស់ខ្លួន ដោយ Optimus ចែករំលែកបច្ចេកវិទ្យាសំខាន់ៗដូចជា ថាមពលអាគុយ ម៉ូទ័រទំនើប កម្មវិធី និងប្រព័ន្ធ AI ដែលដំបូងត្រូវបានបង្កើតឡើងសម្រាប់រថយន្តអគ្គិសនីរបស់ Tesla។ លោក Musk បានពន្យល់ថា "វាជាមនុស្សយន្តដែលមានដៃនិងជើង ជំនួសឱ្យមនុស្សយន្តដែលមានកង់"។
Tesla មិនមែនជាក្រុមហ៊ុនតែមួយគត់នៅក្នុងទីផ្សារមនុស្សយន្តនោះទេ។ ក្រុមហ៊ុន Boston Dynamics ដែលជាកម្មសិទ្ធិរបស់ Hyundai រួចហើយផ្តល់ជូននូវមនុស្សយន្ត Spot របស់ខ្លួនក្នុងតម្លៃ ៧៤,៥០០ ដុល្លារ ខណៈដែលក្រុមហ៊ុនផ្សេងទៀតដូចជា Nvidia និង Figure កំពុងអភិវឌ្ឍមនុស្សយន្តរបស់ពួកគេផ្ទាល់។ យោងតាមក្រុមហ៊ុន Goldman Sachs ទីផ្សារមនុស្សយន្តសកលអាចឈានដល់ ៣៨ ប៊ីលានដុល្លារត្រឹមឆ្នាំ២០៣៥ ដោយមនុស្សយន្តដែលមានតម្លៃសមរម្យអាចនឹងក្លាយជាទូទៅឆាប់ជាងការរំពឹងទុក។
